අකුරැස්සේදී පොලිස් නිලධාරීන්ට වෙඩි තබා ඇත්තේ පසුගියදා පානදුර උතුර පොලීසියේ අවි ගබඩාවෙන් අතුරුදන් අවි දෙකෙන් බවට හෙළිවී තිබේ.
මෙම සිද්ධිය සම්බන්ධයෙන් මේ වනවිට යුද හමුදා සෙබළු 2නෙකු ඇතුළු 5 දෙනෙකු අත්අඩංගුවට ගෙන ඇත.
අංක තහඩු නොමැතිව, පොලිස් අණ නොතකා ස්කූටර් වර්ගයේ යතුරුපැදියකින් පලාගිය තිදෙනෙකු විසින් පසුපස හඹා ආ පොලිස් නිලධාරීන්ට අකුරැස්ස ප්‍රදේශයේ දී වෙඩිතබා තිබුණි.
අකුරැස්ස සිද්ධිය වී තිබුණේ පසුගිය 5 වැනිදා වන අතර එම සිද්ධියෙන් පොලිස් නිලධාරීන් දෙදෙනා තුවාල ලබා රෝහල්ගත කළ අතර සැකකරුවන් පලාගොස් තිබුණි.
මේ පිළිබඳ විමර්ශනයේදී එම යතුරුපැදියෙන් ගමන් ගත් අයකු ඊයේ අත්අඩංගුවට ගත් අතර ඔහුගෙන් කරන ලද ප්‍රශ්න කිරීමට අනුව හමුදා නිලධාරියකු ඇතුළු සෙසු සැකකරුවන් දෙදෙනා සහ සඟවා තිබූ අවිආයුධ කිහිපයක් සොයාගැනිණ.
සොයාගත් අවිආයුධ අතර ටී56 ගිනි අවි 2ක්, මැගසින් 2ක් හ සජීවී පතොරම් කිහිපයක් සොයාගෙන තිබේ.
මෙම ටී56 ගිනි අවි පසුගියදා පානදුර උතුර පොලීසියේ අවි ගබඩාවෙන් අතුරුදන් වී තිබූ ගිනිඅවි බවට තහවුරු වී ඇත.
මේ අනුව අද පෙරවරුවේ දී පොලීසියේ අවි සොරකමට අදාළව තවත් හමුදා සෙබළෙක් සහ ආධාර හා මුදල් සැපයූවකු අත්අඩංගුවට ගෙන තිබේ.
අකුරැස්ස වෙඩි තැබීමේ සිද්ධිය සහ පොලීසියේ අවි ගබඩාවෙන් අවි අතුරුදන් වීම හා ඒවා හමුවීමට අදාළව දීර්ඝ විමර්ශනයක් සිදුකෙරෙන බව පොලීසිය පවසයි.
