ප්‍රබෝධා හෙට්ටිආරච්චි
ශ්‍රී ලංකා ටෙස්ට් ක්‍රිකට් නායක දිමුත් කරුණාරත්නට දඩ මුදලක් පැනවීමට ශ්‍රී ලංකා ක්‍රිකට් ආයතනය තීරණය කර තිබේ.
ඒ බීමතින් රිය පදවා අනතුරක් කිරීමෙන් ශ්‍රී ලංකා ක්‍රිකට් චර්යා ධර්ම පද්ධතිය කඩ කළ බවට වන චෝදනාව වෙනුවෙනි.
මෙලෙස පනවන ලද දඩ මුදල අමෙරිකානු ඩොලර් 7500ක් හෙවත් ශ්‍රී ලංකා මුදලින් රුපියල් මිලියන 1.3කි.
සිය නිවස වෙත යමින් සිටියදී දිමුත් විසින් අනතුරක් සිදුකර තිබූ අතර ඔහු පොලිස් අත්අඩංගුවට ගෙන පැය 2ක් වැනි සුළු කාලයකදී ඇප මත මුදා හැරිණි.
මෙම අනතුර පිළිබඳව සිය සමාජ මාධ්‍ය ගිණුම් ඔස්සේ ඔහු සියලු දෙනාගෙන් සමාව ඉල්ලා තිබුණි.
ශ්‍රී ලංකා ක්‍රිකට් ආයතනය නිවේදනය කර තිබුණේ දිමුත්ගේ ක්‍රීඩක චර්යා ධර්ම ගිවිසුමට අනුව සිදු කළ පරීක්ෂණයකට පසු මෙලෙස ඔහුට මෙම දඩ මුදල නියම කළ බවයි.
දිමුත්ට පැනවූ දඩ මුදල එක් ටෙස්ට් තරගයක් වෙනුවෙන් ලබාදෙන තරග ගාස්තුවට සමාන බව සඳහන් ය.
