විද්‍යා ප්‍රබන්ධ චිත්‍රපටවල පමණක් මෙතෙක් අප දුටු පියාසර කරන මෝටර් රථයක් සැබෑවක් බවට පත්කරමින් ස්ලෝවැකියාවේ නගර දෙකක් අතර මූලාකෘති පියාසර මෝටර් රථයක් අත්හදා බැලීමේ ගුවන් ගමන ඊයේ (1) මිනිත්තු 35කින් පසුව සාර්ථකව අවසන් කර තිබේ.
එරට වාර්තා පවසන්නේ ක්ලයින් විෂන් හි ‘එයාර්කාර්’ වාහනය මෙලෙස නයිට්‍රා සහ අගනුවර වන බ්‍රැටිස්ලාවාව අතර එය සාර්ථක අන්දමින් පියාසර කොට යළි ගොඩැබීමෙන් පසු විනාඩි කිහිපයකදී මෝටර් රථයක් බවට පරිවර්තනය වී නගරය වෙත ගමන් කළ බවයි.
එයාර්කාර් ප්‍රොටොටයිප් 1 ලෙස හැඳින්වෙන මෙය අශ්වබල 160 ක BMW එන්ජිමකින් බල ගැන්වේ. එය ස්ථාවර ප්‍රචාලකයකින් සමන්විත වන අතර මිනිත්තු තුනකටත් අඩු කාලයකින් ගුවන්යානයේ සිට මෝටර් රථයක් දක්වා පරිවර්තනය වේ.
ක්ලයින් විෂන් සමාගමට අනුව අඩි 8,200 ක වේගයෙන් පියාසර කිරීම සහ පැයට කිලෝමීටර් 190 ක උපරිම වේගයකින් (පැයට සැතපුම් 118) ළඟා වීම ඇතුළුව එය දැන් පැය 40 කට වඩා වැඩි පරීක්ෂණ ගුවන් කාලයක් සපුරා තිබේ.
ඊයේ සාර්ථකව ගුවන් ගමන අවසන් කොට බ්‍රැටිස්ලාවාවට ගොඩබැසීමෙන් පසු යානය මෝටර් රථයක් බවට පරිවර්තනය වූ අතර ක්ලයින් විෂන් හි ප්‍රධාන විධායක නිලධාරි ස්ටෙෆාන් ක්ලයින් සහ සමාගමේ සම-නිර්මාතෘ ඇන්ටන් සාජාක් විසින් එය නගර මධ්‍යයට ගෙන යන ලදී.
“පියාසර කරන කාර් එකක් කියන්නේ තවදුරටත් සංකල්පයක් පමණක් නොවේ. එය විද්‍යා ප්‍රබන්ධ යථාර්ථයක් බවට පත් කර තිබේ.” යැයි ක්ලයින් සහ සමාගමේ සම-නිර්මාතෘ ඇන්ටන් සාජාක් පවසයි.
අශ්වබල 300 ක එන්ජිමක් සහිතව AirCar Prototype 2 නමින් ගුවන් කාරයක් නිපදවීමට දැන් සමාගම කටයුතු කරමින් සිටී.
එමගින් පැයට කිලෝමීටර් 300 ක වේගයෙන් (පැයට සැතපුම් 186) ගමන් කළ හැකි අතර කිලෝමීටර් 1,000 (සැතපුම් 621) පරාසයක් අපේක්ෂිත අතර නුදුරු දිනයකදීම එය ද අත්හදා බැලීමට සිදුකරනු ඇත.
