කොරෝනා රෝගයෙන් ගැලවීමේ අරමුණින් , හිතුමතේ විවිධ ඖෂධ වර්ග භාවිතා කිරීම හරහා , ඉතා හානිදායක ප්‍රතිඵල අත්කර දිය හැකි බව සෞඛ්‍ය අමාත්‍යංශයේ සෞඛ්‍ය ප්‍රවර්ධන කාර්යාංශයේ නියෝජ්‍ය අධ්‍යක්ෂ වෛද්‍ය දිනේෂ් කොග්ගලගේ මහතා මාධ්‍ය වෙත අවධාරණය කර සිටී .
මාධ්‍ය වෙත මේ පිලිබන්දව වැඩිදුරටත් අදහස් දක්වමින් මෙසේද පැවසීය ,
කොවිඩ්- 19 වැළඳුණ රෝගීන්ට සහ එම ආසාදනයෙන් වැලැකීමට යැයි විවිධාකාර බෙහෙත් වට්ටෝරු මේ දිනවලදී සමාජ මාධ්‍ය අතර නිරන්තරයෙන් හුවමාරු වෙමින් පවතී. මෙහි පදනම කුමක් වුවත් සායනිකව තහවුරු කිරීම් නැති මේ බෙහෙත් වට්ටෝරුවලට රෝගීන්ගේ ඇති අනුගත වීම නම් පුදුම උපදවන සුළුය. වෛද්‍ය අනුමැතියකින් තොරව ඔබගේ අභිමතය පරිදි කොවිඩ්-19 රෝගයට ඖෂධ ලබා ගැනීම කෙතරම් හානිදායකද යන්න ඔබ සබුද්ධිකව සිතා බැලිය යුතුය.
මෙසේ හුවමාරු වන ඇතැම් ඖෂධ වට්ටෝරු ගෙන බැලූ විට ඒවායේ බහුලව ඇතුළත් කොට ඇත්තේ විවිධ විටමින් වර්ගයි. විටමින් යනු අත්‍යවශ්‍ය පෝෂණ සංඝටකයක් වුවද ඒවා අතිරේක ලෙස ලබා ගත යුත්තේ වෛද්‍ය නිර්දේශ මත පමණි. විවිධ වර්ගයේ විටමින රාශියක් එකවර ගැනීමෙන් සුවිශේෂී කිසිඳු ප්‍රතිඵලයක් අත් නොවේ. එසේම මේ දිනවල සුලබව ලබා ගන්නා විටමින ලෙස විටමින් සී, විටමින් ඩී, විටමින් ඊ, විටමින් බී දැක්විය හැකියි.
රෝගී – නිරෝගී දෙපිරිසම දිනකට තුන් හතර වතාවක් විටමින්‘සී‘ පෙති වශයෙන් ලබා ගැනීමටද මේ වනවිට පෙළඹී තිබේ. මෙයද රැල්ලට මිස කිසිඳු වෛද්‍ය උපදෙසකින් තොරවයි.
අපි මෙයාකාරයෙන් විටමින්‘සී‘ බෙහෙත් පෙත්තක් ලෙසින්ම ලබා ගත යුතු නැත. විටමින්‘සී‘දුර්වලතාවක් පවතී නම් පමණක් වෛද්‍ය අනුමැතිය මත නියමිත මාත්‍රාව පමණක් ලබා ගැනීම වරදක් නොවෙයි. නමුත් විටමින්‘ සී‘පෙති දිනකට බොහෝ වාරයක් භාවිත කිරීම අවශ්‍යම නොවේ.
විටමින් ‘ සී‘ ජලයේ ද්‍රාව්‍ය විටමිනයක් වන නිසා ඔබ වැඩිපුර ලබා ගන්නා සියල්ල මුත්‍රා සමග පිටවීම සිදුවේ. විටමින්‘සී‘ස්වභාවිකව ලබා ගත හැකි ප්‍රභව ඕනෑ තරම් ඇති නිසා ඒවා මගින් ශරීරයට අවශ්‍ය ප්‍රමාණය ලබා ගැනීම වඩාත් උචිතවේ.
විටමින්‘සී‘ වුවද දිනකට අවශ්‍ය ප්රමාණයක් ඇත. එය බෙහෙත් පෙත්තක් මගින් ලබා ගැනීමට වඩා විටමින්‘සී‘ ලැබෙන ප්‍රභව කොපමණ තිබෙනවාද? දෙහි, දොඩම්, අඹ, පේර, ඇඹරැල්ලා, නාරං වැනි නැවුම් පලතුරු වර්ගල නැවුම් එළවලු වර්ග වැනි දෑවල විටමින්‘සී‘ අඩංගු වේ. මෙවැනි ස්වභාවික ප්‍රභව මගින් ඕනෑම කෙනෙකුට දෛනික අවශ්‍යතාව මනා ලෙස පිරිමසා ගත හැකියි.
‘ගැස්ට්‍රයිටීස්’ වැනි උදරයේ අබාධ, වමනය, පාචනය වැනි අතුරු අබාධ සහ දීර්ගකාලීන ලෙස අධික මාත්‍රෙවන් කාලයක් පුරා ගැනීමෙන් අස්ථි සහ දත්වල අබාධ, වකුගඩු ආශ්‍රත ගල් ඇතිවීම, වෙනත් පෝෂක අසමතුලිතතා ඇති විය හැකියි.
තවද සමහර විටමින් වර්ග ජලයේ දියවේ. එබඳු විටමින් කොපමණ ගත්තද සිරුර විසින් අවශ්‍ය ප්‍රමාණය පමණක් රඳවා ගනිමින් අතිරික්තය මුත්‍රා සමඟ පිට කරයි. එමනිසා වැඩි මාත්‍රාවෙන් ලබා ගැනීමෙන් කිසිඳු අමතර වාසියක් නැත. සිදු වන්නේ අනවශ්‍ය අතුරු ආබාධ ඇතිවීමයි. තවද විටමින් ‘ඒ‘, ‘ඩී‘,‘ඊ‘ සහ ‘කේ‘යන විටමින වර්ග ජලයෙහි දිය නොවන අතර ඒවා මේද ද්‍රාව්‍ය නිසා සිරුරේ අනවශ්‍ය ලෙස තැන්පත් විය හැකියි. අනවශ්‍ය ආකාරයෙන් මෙබඳු විටමින වරද සිත් සේ දිගුකාලීනව ලබා ගැනීම විවිධ අතුරු ආබාධවලට අත වැනීමක් වනු ඇත.
සමාජ මාධ්‍ය අතර හුවමාරු වන සමහර ඖෂධ වට්ටෝරුවල ප්‍රතිජීවක ඖෂධ කිහිපයකම නම් ඇතුළත් කර තිබෙනු දැකිය හැකියි. මෙවැනි පදනමක් නැති වට්ටෝරුවල ඇතුළත් බෙහෙත් භාවිත කිරීම ඉතා අවදානම් බව මතක තබා ගන්න. වෛද්‍යවරයෙකු ප්‍රතිජීවක ඖෂධ නියම කරන්නේ බැක්ටීරියා ආසාදනයකටයි. කොරෝනා යනු වයිරසයක් මිස බැක්ටීරියා ආසාදනයක් නොවේ. එමනිසා මෙම වයිරස් රෝගයකට අනවශ්‍ය ලෙස ප්‍රතිජීවක භාවිතය නොකළ යුතුය.
එසේ නමුත්ඇතැම් රෝගීන්ට කොවිඩ් රෝගයේ සංකූලතා වැඩිවී නිව්මෝනියා තත්ත්වයක් දක්වා වර්ධනය වී ද්විතීයික ලෙස බැක්ටීරියා ආසාදනයක් ඇතිවිය හැකිය. එම අවස්තාථාවලදී පමණක් වෛද්‍යවරයා විසින් එම බැක්ටීරියා අසාදනයට අදාල විශේෂිත ප්‍රතිජීවක ඖෂධය ලබා දීමට කටයුතු යොදනු ඇත. එසේ නොමැතිව ප්‍රතිජීවක ඖෂධ අතොරක් නැතිව සාමාන්‍ය රෝග ලක්ෂණ පෙන්වන හෝ කිසිදු රෝග ලක්ෂණ නොපෙන්වන ආසාදිතයන් මුල් අවස්ථාවේම ලබා ගනිමින් අවභාවිත කිරීම මගින් එම බැක්ටීරියාවන් අදාල ප්‍රතිජීවක සඳහා ප්‍රතිරෝධී වීමේ දැඩි අවදානම් තත්ත්වයක් හට ගනී. එසේ වීමෙන් රෝගය උත්සන්න වූ අවස්ථාවක දී භාවිත කිරීම සඳහා කිසිඳු ප්‍රතිජීවක ඖෂධයක් නොමැති වීමෙන් රෝග තත්ත්වය මාරාන්තික විය හැකිය. මෙය මුළු මහත් මානව ප්‍රජාවටම අවසානයේ මහත් හාකර ප්‍රතිඵල අත්කර දෙනු ඇත.
ඇතමෙකු ආසාදිතයකු බව දැන ගත් මොහොතේ සිට ‘ඩෙක්සමෙතසෝන්‘ සහ ප්‍රෙඩ්නිසිලෝන් ඖෂධ දෙවර්ගයත් අධික ලෙස ලබා ගන්නා බව හෙළිවී ඇත. එකම කාණ්ඩයට අයත් මෙම බෙහෙත් දෙවර්ගයම අනවශ්‍ය ලෙස ගැනීම සිරුරේ ප්‍රතිශක්තිය අඩු කිරීමට හේතු වේ. අතුරු ආබාධ වශයෙන් ගැස්ට්‍රයිටීස් වැනි තත්ත්ව ඇති කරයි. මෙම ඖෂධ වෛද්‍යවරු විසින් නියම කරනු ලබන්නේ රෝග තත්ත්වය අනුව වන අතර රෝගය උත්සන්න වන අවස්ථාවකදී පමණි. එමනිසා ප්‍රතිශක්තිය තවත් හීන කරන මෙවන් ඖෂධ හිතුමනාපයේ භාවිතය වයිරසයට එරෙහිව සටන් කිරීමට ඇති හැකියාව දුර්වලකර රෝගය තවත් උත්සන්න වීමට බල පැ හැකිය.
ගෘහාශ්‍රිතව සිටින කොවිඩ් ආසාදිතයන්ට ප්‍රතිශක්තිය වඩවා ගැනීමට අප ලබා දෙන උපදේශ වන්නේ හොඳ සමබල ආහාර වේලක්ලබා ගන්නා ලෙසයි. එහි පළා වර්ගයක්, එළවළු සේම මස්, මාළු, බිත්තරවලින් කැමති එක් වර්ගයක් ඔබේ ආහාරයට එකතු කර ගන්න. හැකිතාක් නැවුම් පලතුරක් අහාරයට ගැනීමට උත්සාහ කරන්න. දිනපතාම වැඩිහිටියෙකු නම් දියර වතුර ලීටර් දෙක හමාරක් තුනක් අතර ප්රමාණයක් පානය කරන්න.
ගතට විඩාව ගෙන දෙන කාර්යන්හි නිරත නොවී අනවශ්‍ය ආතතියෙන් බැහැරව මනා විවේක සුවයකින් ගත කිරීම රෝග තත්වයෙන් ඉක්මනින් මිදීමට මහත් රුකුලක් වෙයි. හොඳින් හිරුඑළිය සහ වාතාශ්‍රය ලැබෙන ස්ථානයක් තිබේ නම් එයවඩාත් හොඳය. සැම විටම නිවැරැදි සෞඛ්‍ය පුරුදු අනුගමනය කරමින් පවුලේ අනෙකුත් සාමාජිකයන්ගෙන් වෙන්වී සිටීම ඉතා වැදගත්වේ.
යම් හෙයකින් වැඩිහිටි කොවිඩ්-19 රෝගියෙකුට උණ ගතිය ඇතිනම් පැය 6න් 6ට පැරසිටමෝල් පෙති 02 බැගින් ගත හැකියි. දරුවන්ට නම් සිරුරේ බර අනුව අවශ්‍ය මාත්‍රාව ලබා දිය හැකිය. උණ වැනි රෝග ලක්ෂණයකදී රෝගියාට ගත හැකි අප විසින් නිර්දේශිත එකම ඖෂධය පැරසිටමෝල් පමණි. වෙනත් ඖෂධවල අවශ්‍යතාව සැම විටම වෛද්‍ය නිර්දේශය මත තීරණය කළ යුතුය.
හුස්ම ගැනීමේ අපහසුතාවක් වැනි වෙනත් රෝග සංකූලතා මතු වේ නම් වහාම වෛද්‍ය උපදෙස්වලට යොමු විය යුතුයි. රෝග සංකූලතාවල වර්ධනය සමඟ අවශ්‍ය කෙරෙන ඖෂධ තීරණය කිරීම වෛද්‍යවරයා විසින් කරනු ලැබේ.
ඇතැම් විට ඔබ දියවැඩියාව, අධි රුධිර පීඩනය වැනි නිදන් ගත රෝගයකින් පෙළෙන්නකු නම් ඒ සඳහා ගන්නා බෙහෙත් නොකඩවාම ලබා ගත යුතුයි.
කොවිඩ්-19 රෝගයේදී එක් එක් ඖෂධය ලබා දිය යුතු අවස්ථාවන් ගැන සාමාන්‍ය පුද්ගලයන්ට මනා අවබෝධයක් නැති අතර ඖෂධ නියමිත පරිදි නිසි මාත්‍රාවෙන් නියම කිරීම වෛද්‍යවරයකුගේ කාර්යය භාරයකි. එකී උපදෙස් අනුව කටයුතු කරමින් ඔබගේත් ඔබගේ ආදරණීයන්ගේත් නිරෝගීභාවය රැක ගැනීම ඔබගේ වගකීමයි.
