ඉන්දියාවේ තමිල්නාඩුවේ පිහිටි සරණාගත කඳවුරුවල සිට මෙරටට පසුගිය දා එවූ ලාංකිකයන් 59 දෙනා අතර එල්ටීටීඊයේ හිටපු ප්‍රබලයන් දෙදෙනෙකු ද සිටින බවට රාජ්‍ය බුද්ධි සේවය අනාවරණය කරගෙන තිබේ.
ඔවුන් මෙරට ගැටුම් පැවැති සමයේ හා ඊට පසුව බෝට්ටු මගින් නීතිවිරෝධී ලෙස තමිල්නාඩුවට පලාගිය පුද්ගලයන් ය. මෙතෙක් ඔවුන් එරට සරණාගත කඳවුරු තුළ රඳවා සිටියහ.
ඔවුන්ගෙන් එක් අයකු මෙරට ත්‍රස්තවාදය පරාජය කිරීමෙන් පසුව පුනරුත්ථාපනයට ලක්වූ අයෙකි.
අනෙක් පුද්ගලයා ගැටුම් පැවති අවධියේම බෝට්ටුවෙන් තමිල්නාඩුවට පලාගිය අයෙක් වන අතර ඔහු කරුණා අම්මාන්ගේ ගෝලයෙකි.
මොවුන් පසුගියදා ඉන්දියාවෙන් මෙරටට එවා තිබුණේ කොන්දේසි මාලාවක් සහිතව බැවින් ඔවුන් අත්අඩංගුවට ගැනීමේ හැකියාවක් නොමැති බව පැවසේ.
එහෙත් ඔවුන් දෙදෙනාගේ හැසිරීම් පිළිබඳව සොයාබැලීමේ ආවේක්ෂණයට ලක්කෙරෙන බව රාජ්‍ය බුද්ධි සේවා ආරංචි මාර්ග තහවුරු කළේය.
