පාස්කු ඉරිදා සිදුවූ ප්‍රහාරය වීමට පෙර රාජ්‍ය බුද්ධි සේවයෙන් ලද අනතුරු ඇඟවීම සම්බන්ධයෙන් නිසි පියවර නොගත් කොළඹ උතුරු කොට්ඨාශ භාරව සිටි පොලිස් අධිකාරි සංජීව බණ්ඩාර මහතා ප්‍රහාරයෙන් පසුව කොළඹ උතුරු කොට්ඨාශයේ පොලිස් ස්ථානවල ස්ථානාධිපතිවරුන්ට බලපෑම් කරමින් කල්තියා තොරතුරු ලැබුණු බවටත් එම තොරතුරු අනුව ක්‍රියාත්මක වූ බවටත් ව්‍යාජ සටහන් යොදා ඇතැයි ප්‍රහාරය පිළිබඳ සොයාබැලීමේ ජනාධිපති කොමිසමට සාක්ෂි දෙමින් කොටහේන හිටපු පොලිස් ස්ථානාධිපතිවරයා හෙළි කරයි.
සංජීව බණ්ඩාර මහතා විසින් බලහත්කාරයෙන් එම තොරතුරු පෙර ලද බවට පොලිස් පොත්වල සටහන් තබන ලෙස බලපැම් කළ බව සාක්ෂි විමසීමේදී අනාවරණය වී ඇත.
එමෙන්ම තොරතුර ලැබූ පසුව කොටහේන දේවස්ථානයේ පවා ආරක්ෂාව තර කළ බවට ද ව්‍යාජ ලෙස එම සටහනේ යොදා තිබේ.
මෙම බලපෑමට යටත් නොවී එය වරදක් බවට පවසමින් එසේ ලිවීමට එරෙහි වී ඇත්තේ වෙරළබඩ පොලිස් ස්ථානාධිපතිවරයා පමණක් බවට ද මෙහිදී හෙළිවී තිබේ.
කොටහේන දේවස්ථානය වෙත එල්ලවූ ප්‍රහාරයට පෙර එහි ආරක්ෂාව තරකොට පල්ලිය බේරාගැනීමට තිබියදී එය නොසළකා හැරි සංජීව බණ්ඩාර මහතා මේ වනවිට ජ්‍යෙෂ්ඨ පොලිස් අධිකාරි ලෙස උසස්වීමක් ලබා කළුතර උතුර භාර ප්‍රධානියා ලෙස කටයුතු කරමින් සිටියි.
