මාවනැල්ලේ බුදු පිළිම වලට හානි කිරීම් සම්බන්ධයෙන් අත් අඩංගුවට ගත් සැකකරුවන් නිදහස් කර ගැනීම සඳහා නීතිඥ සහය ගැනීමට සහරාන් විසින් රුපියල් ලක්ෂ 20ක මුදලක් අත්අඩංගුවට ගත් සැකකරුවන්ගේ පවුලේ සාමාජිකයන්ට බෙදාදුන් බව කියන කොන්ත්‍රාත්කරුවකු අපරාධ පරීක්ෂණ දෙපාර්තමේන්තුවේ විශේෂ පොලිස් කණ්ඩායමක් ඊයේ රාත්‍රි මාවනැල්ලේ දී අත්අඩංගුවට ගෙන තිබේ.
මෙම පුද්ගලයා සහරාන් සමග ඉතා සමීපව සම්බන්ධකම් පැවැත් වූ අයෙක් බව හෙළිවී තිබේ.
මෙම පුද්ගලයා ගැන තොරතුරු අනාවරණය වී ඇත්තේ හිටපු ඇමති රිසාද් බදියුදීන් මහතාගේ සහෝදරයා සමඟ අත්අඩංගුවට ගත් නීතිඥවරයා සම්බන්ධයෙන් කෙරෙන විමර්ශනවලදී ය.
මාවනැල්ලේ බුදු පිළිම හානි කිරීම්වලට අත්අඩංගුවට ගෙන බන්ධනාගාරගත කර සිටි සැකකරුවන් වෙනුවෙන් එම නීතිඥවරයා ද පෙනී සිට ඇතැයි අපරාධ පරීක්ෂණ දෙපාර්තමේන්තුව සඳහන් කරයි.
සහරාන්ගේ උපදෙසින් බෙදා දුන් ලක්ෂ 20 ක මුදල අදාල නීතිඥවරයාට සම්බන්ධ නීති සමාගමකට යොමු වී තිබෙන බව අපරාධ පරීක්ෂණ දෙපාර්තමේන්තුව අනාවරණය කරගෙන තිබේ.
අදාල මුදල් බෙදා හරින ලද පුද්ගලයා ගොඩනැගිලි කොන්ත්‍රාත් ව්‍යාපාරිකයෙක් බවත් ඔහු හිටිහැටියේ ධනවතෙක් වූ අයෙක් බවත් විමර්ශනවලදී හෙළිවී තිබේ.
