පැතුම් වික්‍රමරත්න
ශ්‍රී ලංකාවේ මානව හිමිකම් සම්භන්ධයෙන් මහා බ්‍රිතාන්‍යය ඇතුළු රටවල්ව පහක අනුග්‍රාහකත්වයෙන් ජගත් මානව හිමිකම් කවුන්සිලය වෙත ඉදිරපත් කර ඇති නවතම යෝජනාවලිය සඳහා ශ්‍රී ලංකා රජයේ නිල එකඟතාවයද මේ වනවිට ලැබී ඇති බව ජගත් සංවිධාන අභ්‍යන්තර ආරංචිමාර්ග සඳහන් කර සිටී.
ඒ අනුව අදාළ යෝජනාවට සමඅනුග්‍රහකත්වය ලබාදීම සඳහා ජීනිවා හි ශ්‍රී ලංකාවේ නිත්‍ය නියෝජිත ඒ.එල්.ඒ අශිස් මහතා මේ වනවිටත් අදාළ ලියකියවිලිවලට අත්සන් තබා ඇති බවද වාර්තාවේ.
මේ අනුව ඉදිරියේදී මෙම යෝජනාවේ සම අනුග්‍රාහකත්වයට ශ්‍රී ලංකාවද නිල වශයෙන් එක්වීමට නියමිතව ඇත. දැනට මෙම යෝජනාව සඳහා සම අනුග්‍රාහකත්වය ලබාදෙන්නේ ජර්මනිය, කැනඩාව, මොන්ටනීග්‍රෝ හා මැසිඩෝනියාව යන රටවල්ය .
ප්‍රධාන කරුණු හතරකින් සමන්විත මෙම යෝජනාව මගින්, පසුගිය2015 වසරේ ඉදිරිපත්කල යෝජනාවලියේ අඩංගු නිර්දේශ සියල්ල නිසි ලෙස ක්‍රියාත්මක කරන ලෙස ශ්‍රී ලංකවට නැවත යෝජනා කර ඇත.
එසේම ශ්‍රී ලංකාවේ මානව හිමිකම් හා වගවීමේ ක්‍රියාවලිය පිළිබඳව අවශ්‍ය තාක්ෂණික උපදෙස් ලබාදෙන ලෙස මෙමගින් ජගත් සංවිධානය වෙතද යෝජනා කර ඇත.
මේ අතර මෙම යෝජනාවට විරෝධය පළ කරමින් ජගත් දේශප්‍රේමි ලාංකික සංසදය ඊයේ (12) ජිනීවා මානව හිමිකම් මහකොමසාරිස් කාර්යාලයට පෙත්සමක් බාරදෙනු ලැබුවේය.
