හේලීස් සමූහ ව්‍යාපාරයේ ලොජිස්ටික් සමාගමේ කැලණියේ පිහිටි ගබඩාවේ සේවයේ නිරතව සිටි ගිණුම් සහකාරවරයෙක් රුපියල් ලක්ෂ 210 ක මුදලක් වංචා කිරීමක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන අධිකරණයට ඉදිරිපත් කිරීමෙන් පසු ලබන 10 වෙනිදා දක්වා බන්ධනාගාර ගත කර තිබේ.
2019 වසරේ කරන ලද මුදල් වංචාව මෙම පුද්ගලයා සිදුකර ඇත්තේ චෙක්පත් දෙකක් මගිනි. එහෙත් ඒ එම වංචාව සමාගමේ ගණකාධිකාරීවයාට අනාවරණය වී ඇත්තේ පසුගිය දා කළ විගණනයේදී ය.
ඒ සම්බන්ධයෙන් අදාල සමාගම විසින් කළ පැමිණිල්ලකට අනුව කළ විමර්ශනයකින් පසු සැකකරුව මොරටුවේ පිහිටි ඔහුගේ නිවසේදී අත්අඩංගුවට ගෙන ඇත.
මෙම සැකකරු වංචා සහගතව ලබාගත් මුදල් වලින් රුපියල් ලක්ෂ 40 ක් වැයකර මෝටර් රථයක් මිලදී ගෙන ඇත. රුපියල් ලක්ෂ 30 ක රන් භාණ්ඩ සිය බිරිදට මිලට ගෙන දී ඇති අතර ඒ සියල්ල අපරාධ පරීක්ෂණ දෙපාර්තමේන්තු භාරයට ගෙන ඇත.
මෙම පුද්ගලයා රූපවාහිනී වැඩ සටහන්වලටද ව්‍යාපාරිකයෙක් ලෙස පෙනී සිටිමින් සහභාගි වී ඇත.
තරුණ ව්‍යසායකයින්ට අතහිත දීමේ වැඩ සටහනකටද සම්බන්ධ වී සිට ඇති අතර ඔහු නිලියන් කිහිප දෙනෙක් සමගද ඉතා කිට්ටු සම්බන්ධයක් ඇතිකර තිබී ඇතැයි මූලික පරීක්ෂණවලදී හෙළිවී තිබේ.
මෙම මුදල් වංචාවට තවත් අයෙකුගේ සහය ලැබී තිබේදැයි විමර්ශන පවත්වන බව අපරාධ පරීක්ෂණ දෙපාර්තමේන්තුව සදහන් කරයි.
