ගයාන් වීරසිංහ
සෙලෝලයිඩ් පටයක වීර චරිතයකට පණදෙන්නට ගොසින් අවසානයේ රන්ජන් රාමනායක මන්ත්‍රීවරයාට සිදු වන්නේ නැවත ගැලවිල්ලක් නැති වන ලෙස හිරේ විලංගුවේ වැටෙන්නටය. ඒ මෙරට අධිකරණ පද්ධතියට මෙන්ම නීතියේ ආධිපත්‍යයට ඔහු විසින් කළා යැයි කියන බලපෑම් හේතු කොටගෙනය.
ඔහු අධිකරණය තැකුවේ සැහැල්ලුවටය. ආන්දෝලනාත්මක සහ සුවිශේෂී නඩු කටයුතුවලට ඔහු අත පොවමින් විනිසුරුවරුන්ට බලපෑම් කරන්නට ඇත්තේ ඒ නිසා වන්නට පුළුවනි. විනිසුරුවරුන් ද එකී බලපෑම් හමුවේ නිහඬව සිටින්නට ඇත්තේ රන්ජන්ගේ රඟපෑම් හමුවේ ඔහුට දැවැන්ත දේශපාලන බලයක් ඇතැයි සිතන්නට වූ නිසා යැයි විශ්වාස කළ හැකිය. මේ වන විට විශ්‍රාම ගොස් සිටින මහාධිකරණ විනිසුරුවරියක වූ පද්මිණි එන්. රණවක මහත්මිය විශ්‍රාම යන්නට මත්තෙන් තමාට අභියාචනාධිකරණ විනිසුරුවරියක ලෙස උසස් වීමක් ලබාදෙන ලෙස ඉල්ලන හඬපටයෙන් රන්ජන් රාමනායක මන්ත්‍රීවරයාට පින්සේන්ඩු වන්නේ ඒ නිසා වන්නට පුළුවනි.
රන්ජන් රාමනායක මන්ත්‍රීවරයාගේ ලක්ෂයකට අධික හඬපට ගොන්නෙන් කිහිපයක් මේ වන විට ප්‍රසිද්ධ වී හමරය. ඒ අතර ඇත්තේ අධිකරණ විනිසුරුවරුන් තිදෙනෙකු සමඟ ඔහු කරන කතාබහ පමණි. කියැවෙන ආකාරයට තවත් අධිකරණ විනිසුරුවරුන් කිහිප දෙනෙකුම රන්ජන් රාමනායක මන්ත්‍රීවරයාගේ බලපෑම්වලට ලක්වූවන් අතර සිටිති. එක් විනිසුරුවරයෙකු සමඟ ඔහු අදහස් හුවමාරු කරගන්නේ විනිසුරුවරයාගේ නිවසටම ගොසිනි. එම කතාබහ එළියට එන්නේ වීඩියෝ දර්ශනයක්ද සහිතවය. එකී කතාබහ ඔහු වීඩියෝගත කර ඇත්තේ සිය ජංගම දුරකතනයෙනි. ඒ රහසිගතවය.
සමාජ මාධ්‍ය ජාල ඔස්සේ එළියට පැමිණි එම වීඩියෝව රූපවාහිනී මාධ්‍ය මඟින්ද ප්‍රසිද්ධ විය. එම වීඩියෝවට අනුව විනිසුරුවරයාද රන්ජන් රාමනායක මන්ත්‍රීවරයා සමඟ නඩුකටයුතු ගැන කතාබහක නිරත වන්නේ කිසිදු පැකිළීමකින් තොරවය. ඒ නිසාම සිවිල් සංවිධාන කිහිපයක්ම ඒ ගැන අධිකරණ සේවා කොමිසමට පැමිණිලි කරන්නේ ඉදිරිපත් වෙයි. එම වීඩියෝවේ සටහන් වූ රුව බද්දේගම ප්‍රධාන මහේස්ත්‍රාත් ධම්මික හේමපාල මහතාගේය.
රන්ජන් රාමනායක මන්ත්‍රීවරයා එම විනිසුරුවරයා මුණ ගැසෙන්නේ ඔහු මහේස්ත්‍රාත්වරයෙකු ලෙස කඩුවෙල අධිකරණයේ සේවයේ නිරතව සිටියදීය. දේශපාලන මුහුණුවරක් ගත් නඩු කටයුතු රැසක් එකල විභාග වූයේ කඩුවෙල මහේස්ත්‍රාත් අධිකරණයේය. යහපාලන ආණ්ඩුව පැවැති සමයේදී එම නඩු වෙනුවෙන් මහා රෑත් කඩුවෙල අධිකරණය විවෘත කරමින් නඩු ඇසීමට එම විනිසුරුවරයා පියවරගත් බවට චෝදනාවක්ද නැඟී ඇත. අධිකරණ සේවා කොමිසම විසින් ඉකුත් 16 වෙනිදා ඔහුගේ වැඩ තහනම් කිරීමට පියවර ගන්නේ එවන් පසුබිමක් හමුවේය.
ධම්මික හේමපාල විනිසුරුවරයාගේ වැඩ තහනම් කරන්නට අධිකරණ සේවා කොමිසමට බලයක් ඇතත් ගිහාන් පිලපිටිය විනිසුරුවරයා මහාධිකරණ විනිසුරුවරයෙකු බැවින් ඔහු සම්බන්ධයෙන් පියවර ගත යුතුව ඇත්තේ ඔහුගේ පත් වීම් බලධාරියා වන ජනාධිපතිවරයාය.
ඒ අනුව ගිහාන් පිලපිටිය විනිසුරුවරයාගේත් වැඩ තහනම් කරන්නේදැයි මේ ලිපිය සටහන් තබන මොහොත වන තුරුම අවසන් තීන්දුවක් ගෙන නොතිබිණි.
කෙසේ වෙතත් ධම්මික හේමපාල විනිසුරුවරයාගේ මෙන් නොව, ගිහාන් පිලපිටිය විනිසුරුවරයා රන්ජන් රාමනායක මන්ත්‍රීවරයා විසින් නඩු කටයුතු සම්බන්ධයෙන් තමාට කළ බලපෑම් ගැන කල්තියාම අධිකරණ සේවා කොමිසමටත් පොලිස් මූලස්ථානයටත් පැමිණිලි කර තිබුණු බවද කියැවේ.
රන්ජන් රාමනායක මන්ත්‍රීවරයාගේ හඬපටවල ඇති එකී බලපෑම් විනිසුරු ගිහාන් පිලපිටිය මහතාට එල්ල වන්නේ යැයි පෙනී යන්නේ ඔහු කොළඹ ප්‍රධාන මහේස්ත්‍රාත්වරයා ලෙසින් සේවයේ නිරතව සිටි වකවානුවේදීය.
එම බලපෑම එල්ලවන්නේ ශ්‍රී ලංකා නිදහස් පක්ෂයේ ජ්‍යෙෂ්ඨ මන්ත්‍රීවරයෙකු වන ඒ.එච්.එම්.ෆවුසි මහතා වාහනයක් අවභාවිතා කළේ යැයි අල්ලස් කොමිසම විසින් අධිකරණයට ගොනු කළ නඩුවක් සම්බන්ධයෙනි. රන්ජන් රාමනායක මන්ත්‍රීවරයා විනිසුරුවරයාට බලපෑම් කරන්නේ ෆවුසි මන්ත්‍රීවරයාව බන්ධානාගරගත කරන ලෙසටය. එපමණක් නොව, කොළඹ මහේස්ත්‍රාත් අධිකරණයේ විභාග වූ තවත් නඩු කිහිපයකටම ඔහු විනිසුරුවරයාට බලපෑම් කර තිබුණු බව සඳහන්ය.
එකී හඬපට එළියට ඒමත් සමඟ ගිහාන් පිලපිටිය විනිසුරුවරයා වැඩ බලන පොලිස්පති සී.ඩී.වික්‍රමරත්න මහතාට ලිඛිත පැමිණිල්ලක් ඉදිරිපත් කරන්නේ තමන් කොළඹ ප්‍රධාන මහේස්ත්‍රාත් ලෙස සේවයේ නිරතව සිටි වකවානුවේදී අධිකරණයේ විභාග වූ සංකීර්ණ මෙන්ම ආන්දෝලනාත්මක නඩු රාශියකට රන්ජන් රාමනායක මන්ත්‍රීවරයාගෙන් බලපෑම් එල්ල වූ බවකි.
රන්ජන් රාමනායක මන්ත්‍රීවරයාගේ හඬපට පිට වීමෙන් පසු මේ පැමිණිල්ල විනිසුරුවරයා විසින් වැඩබලන පොලිස්පතිවරයාට යොමු කළත් 2015 වසරේදීද එවකට සිටි පොලිස්පති එන්.කේ. ඉලංගකෝන් මහතාට ඒ ගැන පැමිණිල්ලක් කළ බවද එහි සඳහන් විය. ඒ අනුව එවන් පැමිණිල්ලක් එවකට හිටපු පොලිස්පතිවරයාට ලැබී තිබුණේදැයි සොයා බැලීමට වැඩබලන පොලිස්පතිවරයා අමතක කළේ නැත.
එහිදී අනාවරණය වන්නේ අධිකරණ කටයුතුවලට රන්ජන් රාමනායක මන්ත්‍රීවරයා බලපෑම් කරන බව ගිහාන් පිලපිටිය විනිසුරුවරයා කළ එම පැමිණිල්ල ගැන නිසි විමර්ශනයක් එකල සිදු කර ඇතත් කුමන හෝ හේතුවක් මත රන්ජන් රාමනායක මන්ත්‍රීවරයාට එරෙහිව නීතිය ක්‍රියාත්මක වී නැති බවකි.
ඒ සමඟම කියැවෙන්නේ විනිසුරු ගිහාන් පිලපිටිය මහතා අධිකරණ සේවා කොමිසමටද එකල මේ ගැන පැමිණිල්ලක් කර ඇති බවය. රන්ජන්ගේ හඩපට එළියට එන්නේ එකී පැමිණිල්ලෙන් වසර තුනහාමාරකට පමණ පසුවය.
රන්ජන් රාමනායක මහතා අධිකරණ කටයුතුවලට බලපෑම් කරන්නේ විනිසුරුවරුන් මඟින් පමණක් නොව, අධිකරණ තෝල්කවරුන් මඟින්ද කෙරෙන බලපෑමක හඬපටයක් සමාජ මාධ්‍ය ඔස්සේ එළියට ආවේය. ඒ මහනුවර අධිකරණයේ තෝල්කවරයා සමඟ අධිකරණය මඟ හැරසිටීමට ඔහු කරන සාකච්ඡාවක හඩ පටයකි.
මහනුවර අධිකරණයේ ඔහුට ඇත්තේ ගුරුවරියක විවහා කර ගන්නා බවට පොරොන්දු දෙමින් ඇගේ මුදල් වංචා කිරීමේ නඩුවකි. අපරාධ පරීක්ෂණ දෙපාර්තමේන්තුව විසින් ඒ සම්බන්ධයෙන් ඔහුව අත්අඩංගුවට ගෙන අධිකරණයට ඉදිරිපත්කර බන්ධනාගාරයටද යැවුවේය. ඒ ඔහු පළමු වරට බන්ධනාගාරගත වන අවස්ථාවය.
එදා ඔහු රඳවා තැබෙන්නේ බෝගම්බර බන්ධනාගාරයේය. අපරාධ පරීක්ෂණ දෙපාර්තමේන්තුවේ එවකට සහකාර පොලිස් අධිකාරීවරයෙකු ලෙස සේවයේ නිරතව සිටි සේනක කුමාරසිංහ මහතා ඇතුළු නිලධාරීන් කණ්ඩායමක් රන්ජන් රාමනායක මන්ත්‍රීවරයා අත්අඩංගුවට ගන්නේ කෝට්ටේ පිහිටි ඔහු පදිංචිව සිටි නිවසේදීය.
එදා ඔහු අපරාධ පරීක්ෂණ දෙපාර්තමේන්තු නිලධාරීන් නිවසට කඩා වදින විට කාමරයකට වැදී සැඟවෙන්නේ අත්අඩංගුවට ගන්නවාට ඇති බියට වඩා ඔහුගේ සැබෑ ස්වරූපය සඟවාගන්නටය.
මෙවරත් ඔහු අත්අඩංගුවට ගැනීමට කොළඹ අපරාධ කොට්ඨාසයේ නිලධාරීන් මාදිවෙල පිහිටි ඔහු පදිංචිව සිටි නිල නිවසට ගිය විට ඔහු ඉහළ මහලයේ කාමරයට පැන කොණ්ඩය සකසමින් මගුල් ගෙදරකට යන්නට මෙන් සුවඳ විලවුන් ගල්වමින් හැසිරෙන්නේ එදා මෙන්මය. මේ වන විට රන්ජන් රාමනායක මන්ත්‍රීවරයා රඳවා සිටින්නේ මැගසින් බන්ධනාගරයේය. ඒ සැබෑ ස්වරූපයෙනි.
පොලීසිය ඔහු අත්අඩංගුවට ගැනීමට නිල නිවසට ගිය විට ඔහු ෆේස් බුක් සමාජ ජාලය මඟින් සජීවීව විකාශය කරමින් සැකසූ ලස්සන කොණ්ඩය දැන් ඔහුගේ හිසේ නැත. ඒ වෙනුවට ඇත්තේ කොටට කැපූ කොණ්ඩයකි.
රන්ජන් රාමනායක මන්ත්‍රීවරයා අත්අඩංගුවට ගන්නේ ඔහු හඬපට ළඟ තබාගැනීමේ වරදකට නොව, එම හඩපටවලින් එළියට එන අධිකරණ විනිසුරුවරුන්ට කර ඇති බලපෑම් මුල් කරගනිමිනි.
නීතිපති දෙපාර්තමේන්තුව සඳහන් කරන්නේ විනිසුරුවරුන් තිදෙනෙකුට රන්ජන් රාමනායක මන්ත්‍රීවරයා විසින් බලපෑම් කර ඇති බව හඬපටවලින් පැහැදිලිවම හෙළි වන බවය. එම හඬපට රූපවාහිනී මාධ්‍යයෙන් එළියට ආ ඒවාය.
රන්ජන් රාමනායක මන්ත්‍රීවරයාගේ නිල නිවසින් හමුවූ හඬපටවලට පොලීසීය තවමත් අතවත් තබා ඇති බවක් පෙනී යන්නේ නැත. ඒ මෙතෙක් රස පරීක්ෂකවරයා විසින් එම හඬපටවල සහතික කළ පිටපත් පොලීසියට ලබාදී නැති බැවිනි. පොලීසිය එම හඬ අසා විශ්ලේෂණය කරන්නට ගන්නේ රස පරීක්ෂකවරයා පොලීසියට ඒවා භාරදීමෙන් අනතුරුවය.
ඒ වෙනුවෙන් මේ වන විටත් පොලිස් කණ්ඩායම් 10 ක්ම සූදානම් කර ඇත්තේ ලක්ෂයකට අධික හඬපට නිලධාරීන් දෙතුන් දෙනෙකුට පමණක් විශ්ලේෂණය කිරීම ලෙහෙසි පහසු කටයුත්තක් නොවන බැවිනි.
නියෝජ්‍ය සොලිසිටර් ජනරාල් දිලීප පීරිස් මහතා සඳහන් කරන්නේ රන්ජන් රාමනායක මන්ත්‍රීවරයා අත්අඩංගුවට ගැනීමට මුල් වන විනිසුරුවරුන්ට කරන බලපෑම්වලට අදාළ හඬපට සම්බන්ධයෙන් ඒවා විකාශය කළ විද්යුත් මාධ්‍ය ආයතන හතරක ප්‍රධානීන්ගේ ප්‍රකාශ ලබාගනිමින් විමර්ශන ආරම්භ කළ බවය.
එකී විමර්ශන කටයුතු සිදු වන්නේ බස්නාහිර පළාත්භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාගේ අධික්ෂණයෙන් කොළඹ අපරාධ කොට්ඨාසයේ අධ්‍යක්ෂ පොලිස් අධිකාරී ජී.ජේ. නන්දන මහතාගේ මෙහෙයැවීමෙන් එහි ස්ථානාධිපති ප්‍රධාන පොලිස් පරීක්ෂක නෙවිල් ද සිල්වා මහතා ඇතුළු විශේෂ පොලිස් කණ්ඩායමක් විසිනි.
නියෝජ්‍ය සොලිසිටර් ජනරාල් දිලීප පීරිස් මහතා සඳහන් කරන්නේ මෙහි නියම තතු හෙළි කරගැනීමට දීර්ඝ විමර්ශනයක් කළ යුතු බවය. අපරාධ කොට්ඨාසය විසින් එම විමර්ශන සිදු කරන්නේ නීතිපති දෙපාර්තමේන්තුවේ උපදෙස්ද ඇතිවය.
රන්ජන් රාමනායක මන්ත්‍රීවරයාව ඉකුත් 14 වැනිදා අත්අඩංගුවට ගන්නේද නීතිපති දප්පුල ලිවේරා මහතාගේ උපදෙසින් නුගේගොඩ මහේස්ත්‍රාත් අධිකරණයෙන් වරෙන්තුවක්ද ලබාගෙනය. කොළඹ අපරාධ කොට්ඨාශයේ පැය 15කට වැඩි කාලයක් රඳවාතබා ගනිමින් රන්ජන් රාමනායක මන්ත්‍රීවරයාගෙන් ප්‍රශ්න කිරීමෙන් අනතුරුව ඔහුව අධිකරණයට ඉදිරිපත් කරන්නේ 15 වැනිදාය. එදා නිවාඩු දිනයක් වූ බැවින් රන්ජන් රාමනායක මන්ත්‍රීවරයාව ඉදිරිපත් කරන්නේ මහරගම ගොඩිගමුවේ පිහිටි නුගේගොඩ මහේස්ත්‍රාත් වසන්ත කුමාර මහතාගේ නිවසට රැගෙන ගොසිනි. එහිදී නියෝජ්‍ය සොලිසිටර් ජනරාල් දිලීප පීරිස් මහතා පෙන්වා දෙන්නේ රන්ජන් රාමනායක මන්ත්‍රීවරයා සමඟ දුරකතන සංවාදවල නිරත වෙමින් විනිසුරුවරුන් අධිකරණයේ පූජනීයත්වයද කෙලෙසා ඇති බවකි. ඒ මඟින් අධිකරණයේ ස්වාධීනත්වයට එල්ල කර ඇති බලපෑම විශාල බලපෑම විශාලය. දිලීප පීරිස් මහතාගේ අදහස වන්නේ ජනතාව අධිකරණය හෙළා දකින තත්ත්වයකට පවා මේ සිදු වීම පත්ව තිබෙන බවය.
විනිසුරුවරුන් පමණක් නොව, පොලිස් නිලධාරීන්ද, දේශපාලනඥයන්ද, කලාකරුවන්ද , ඇතුළු විවිධ තනතුරු දරන තවත් විශාල පිරිසක්ද රන්ජන් මන්ත්‍රීවරයා සමඟ දුරකතන සංවාදවල නිරතව තිබේ. දිලීප පීරිස් මහතා සඳහන් කරන්නේ ඒ ගැනද යම් විමර්ශනයක් සිදු වන බවකි.
රන්ජන් රාමනායක මන්ත්‍රීවරයා අධිකරණයට ඉදිරිපත් කරන විට ඔහු වෙනුවෙන් නීතීඥවරු කිහිප දෙනෙක්ම ඉදිරිපත් වී සිටියහ.
ඒ අය අතර සිටි වසන්ත රණසිංහ නීතීඥවරයා සදහන් කරන්නට වූයේ එම හඬපටවල ඇත්තේ රන්ජන්ගේම කටහඬදැයි කියා විමර්ශනයක් නොකර පවසන්නේ කෙසේ දැයි කියාය.
ඊට නියෝජ්‍ය සොලිසිටර් ජනරාල් දිලීප පීරිස් මහතාගේ පිළිතුර වන්නේ රන්ජන් රාමනායක මන්ත්‍රීවරයා මහජන නියෝජිතකයෙකු වන බැවින් ඔහුගේ කටහඬ මහජනතාව පවා හොදින් හඳුනන බවය.
රන්ජන් රාමනායක මන්ත්‍රීවරයා සමඟ දුරකතන සංවාදයේ නිරත වන විනිසුරුවරයෙකු තමාගේ සමකාලීනයෙකු බැවින් සැකකාර රන්ජන් රාමනායක මන්ත්‍රීවරයාගේ පමණක් නොව, එම විනිසුරුවරයාගේ කටහඬද තමා හඳුනන බව දිලීප පීරිස් මහතා පැහැදිලිවම පෙන්වා දුන්නේය.
ඇප අහිමි වෙමින් රන්ජන් රාමනායක මන්ත්‍රීවරයාට දෙවැනි වතාවටත් බන්ධනාගර ගත වන්නට සිදු වන්නේ එකී නීති තර්ක හමුවේය.
රන්ජන් රාමනායක මන්ත්‍රීවරයාට මැගසින් බන්ධනාගාරය අලුත් තැනකි. අසනීපයක් සෑදී රෝහල්ගත නොවන්නට ලබන 29 වැනිදා දක්වා රැඳී සිටිය යුතු වන්නේ මැගසින් බන්ධනාගාරයේය. ඔහුට වෙන්ව ඇත්තේද විශේෂ ගණයට වැටෙන සිරකරුවන් රඳවා තැබෙන කොටසය.
කොට්ටයක් පැදුරක් හැරෙන්නට වෙනත් පහසුකමක් ඔහු වෙනුවෙන් බන්ධනාගරයෙන් සැපයෙන්නේ නැත. බෝගම්බර බන්ධනාගාරයේ සිටි ඔහුට බන්ධනාගාර ජීවිතය තරමක් හුරුපුරුදු වූවත් මුල් දිනයේ ඔහුගේ දෑස් තිබී ඇත්තේ කදුළින් තෙත්වය.
දෙවැනි සහ තෙවැනි දිනයන් ගත වන විට ඔහු ඒ ජීවිතයට හුරුවන්නේ සෙසු රැඳවියන් සමඟ කල්ලි ගැසෙමිනි.
දැන් ඔහු සෙසු සිරකරුවන් සමග ගීත ගයති. රස කතා කියති. ඒ අතර ඔහුගේ සුවදුක් බැලීමට හිටපු මැති ඇමතිවරුද බන්ධනාගාරයට එන බැවින් ඔහුට දැන් පාළුවක් නැති ගානය. මේ ජීවිතය කොපමණ කාලයක් ගත කිරීමට තමාට සිදු වනු ඇති දැයි ඔහුම දන්නේ නැත.
