සහරාන් හෂීම් සමග ත්‍රස්ත කටයුතුවලට සම්බන්ධ වූ ඔහුගේ ගෝලයෙක් වැලිකඩ බන්ධනාගාරයේ රඳවා සිටියදී අභිරහස් ලෙස ඊයේ මියගොස් තිබේ.
මොහු සහරාන්ගේ හම්බන්තොට පුහුණු කඳවුරෙන් බෝම්බ පිපිරවීම ඇතුළු අන්තවාදී ක්‍රියා සම්බන්ධයෙන් මරාගෙන මැරෙන පුහුණුව ලැබූවෙක් බව සඳහන් වෙයි.
සැකකරු අත්අඩංගුවට ගෙන තිබුණේ අපරාධ පරීක්ෂණ දෙපාර්තමේන්තුව විසිනි.
කාත්තන්කුඩි ප්‍රදේශයේ පදිංචිව සිටි 19 හැවිරිදි මොහු පසුව ත්‍රස්ත විමර්ශන ඒකකය වෙත භාරදී තිබේ.
ඉකුත් 9 වැනිදා දක්වා ඔහු රඳවා සිට ඇත්තේ ත්‍රස්ත විමර්ශන කොට්ඨාශයේ භාරයේය.
එදින ඔහු අධිකරණය වෙත ඉදිරිපත් කිරීමෙන් අනතුරුව බන්ධනාගාර භාර කොට ඇත.
12 වැනිදා හදිසියේම ඇතිවූ රෝගී තත්ත්වයක් හේතුකොටගෙන බන්ධනාගාරයේ රෝහල්ගත කර ඇත.
13 අලුයම ඔහු මියගොස් තිබේ.
කොළඹ අධිකරණ වෛද්‍යවරයා විසින් අද දින එම මරණය සම්බන්ධයෙන් පශ්චාත් මරණ පරීක්ෂණය සිදුකර ඇත.
එහිදී නිගමනය වී ඇත්තේ දරුණු වෛරසයක් හේතුවෙන් ඔහු මියගොස් ඇති බවයි.
අද දවස තුළදී ඔහු පරීක්ෂා කළ හා ඔහු පිළිබඳ කටයුතුවලට සම්බන්ධ වූ සියලුම නිලධාරීන්, වෛද්‍යවරුන්ට ද විශේෂ ප්‍රතිකාර ද ලබාදී තිබේ.
