කෝකිලායි මුහුදු තීරයේදී පසුගිය මාසයේදී සැකකටයුතු යාත්‍රාවකට වෙඩිතැබී‌මේ සිද්ධියකට අදාළව නාවික හමුදාවේ 12 දෙනකු රක්ෂිත බන්ධනාගාරගත කර තිබේ.
පසුගිය මාසයේ 28 වැනිදා සැකකටයුතු යාත්‍රාවකට නවත්වන ලෙස නාවික හමුදා කෝකිලායි මුහුදු තීරයේ මුර සංචාරයේ යෙදුණු නාවික සෙබළුන් සංඥා කර තිබේ. එහිදී එම යාත්‍රාව නොනැවතී ගමන් කොට ඇති අතර මෙහිදී නාවික හමුදාව විසින් ඒම යාත්‍රාවට ෙවෙඩි තබා ඇත.
පසුව ඒහි සිටි සැකකරුවන් තිදෙනකු නාවික හමුදා අත්අඩංගුවට ගෙන කුච්චවේලී පොලීසියට භාරදී තිබුණි. තවත් සැකකරුවකු ද පොලීසියට භාරදී ඇත. මෙම සැකකරුවන් සිව්දෙනා ත්‍රිකුණාමල වරාය පොලීසියට භාරදෙන ලද අතර ඉන්පසුව සිව්දෙනාම රෝහල්ගත කර ඇත.
මහේස්ත්‍රාත් අධිකරණයට සැකකරුවන් ඉදිරිපත් කළ අවස්ථාවේදී ඔවුන් පවසා තිබුණේ යාත්‍රාවට නාවික හමුදාව විසින් ෙවෙඩි තබා පසුව ඔවුන්ට පහර දුන් බවය. ඔවුන්ට තුවාල සිදුවුණේ ඒ් අනුව බවට ද පවසා තිබේ.
මෙම ප්‍රකාශය සැළකිල්ලට ගෙන ඔවුන් නිරීක්ෂණය කොට සැකකරුවන් ඇප මත මුදාහැරීමටත් නාවික හමුදා නිලධාරීන් දෙදෙනකු හා සෙබළු 10 දෙනකු අත්අඩංගුවට ගෙන අද දින ඔවුන් හදුනාගැනීමේ පෙරට්ටුවක් සදහා ලබන 16 දක්වා රක්ෂිත බන්ධනාගාරගත කර තිබේ.
