වෙන්නප්පුව හෝටලයක පවත්වාගෙන ගිය සූදුපොළක් වැටලීමේ සිද්ධියකට අදාළව හලාවත මූලස්ථාන පොලීසියේ සේවය කරන කොට්ඨාස දූෂණ මර්දන අංශයේ කටයුතු කළ ස්ථානාධිපති ඇතුළු නිලධාරීන් 8 දෙනෙකුගේ වැඩ තහනම් කර තිබේ.
පොලීසියට ලද තොරතුරක් මත වෙන්නප්පුව හෝටලයක් තුළ පවත්වාගෙන ගිය සූදුපොළක් පසුගියදා වැටලූ මෙම නිලධාරීන් එහිදී සැකකරුවන් 9 දෙනෙකු අත්අඩංගුවට ගෙන ඇත්තේ එහි 20කට වැඩි සංඛ්‍යාවක් සිටියදීය.
ඉතිරි සැකකරුවන් මුදාහැරීම, සූදුපොළේ තිබූ මුදල් හා සැකකරුවන් සන්තකයේ තිබූ මුදල් අයථා ලෙස ලබාගෙන දූෂිත ක්‍රියාවක් කළ බවට ලද තොරතුරු මත මෙම වැඩ තහනම ක්‍රියාත්මක කර ඇත.
ඒ අනුව හලාවත පොලීසියට අනුයුක්තව සේවය කළ කොට්ඨාස දූෂණ මර්දන අංශයේ ස්ථානාධිපති උප පොලිස් පරික්ෂකවරයකු, පොලිස් සැරයන්වරයකු, පොලිස් කොස්තාපල්වරුන් 5 දෙනෙකු සහ පොලිස් කොස්තාපල් රියදුරකු ඇතුළු 8 දෙනෙකුගේ වැඩ තහනමට ලක්කර ඇත.
