ශ්‍රී ලංකා ඉතිහාසයේ ඩී.බී. විජේතුංග මහතාට පසුව ජනාධිපතිවරයකු වූ අහිංසකම පුද්ගලයා මෛත්‍රීපාල සිරිසේන මහතා බව රාජ්‍ය අමාත්‍ය රංජන් රාමනායක මහතා පවසයි.
ඔහු මේ බව පැවසුවේ අද පැවැති උසස් පෙළ විභාගයට මුහුණ දීම සදහා විභාග මධ්‍යස්ථානයට ගිය අවස්ථාවේදී මාධ්‍යවේදීන්ගේ ප්‍රශ්නවලට පිළිතුරු දෙමිනි.
හෙතෙම පෙන්වා දෙන්නේ මෑත කාලීන දේශපාලනය දෙස බැලීමේදී ජනාධිපතිවරුන් ලෙස පත්වූ සෑම දෙනකුම පාහේ මැරකම්, වංචා දූෂණවලට ලක්වූවන් බවයි.
නමුත් මෛත්‍රීපාල සිරිසේන මහතා ජනාධිපතිවරයා වූ දා සිට මෙතෙක් කිසිදු පුද්ගලයකු ඝාතනයට අනුබල නොදුන් බවත් හොරමැරකම්වලට සම්බන්ධ නොවන බවත් ඔහු අහිංසකයකු බවත් හෙතෙම කියාසිටියි.
පසුගිය ජනාධිපතිවරණයේදී එක්සත් ජාතික පෙරමුණ ‘ගැසූ ගේම මේ පාර පොහොට්ටුව ගසන්නට ඉඩ ඇතැයි’ ද හෙතෙම කියාසිටියේ ‘ගෝඨාභය පෙන්න පෙන්න ඉදලා අන්තිමේදී වෙන කෙනකුට දෙන්නත් ඉඩතියෙනවා. ශිරන්තිට දෙයිද දන්නෙත් නෑ’ යනුවෙනි.
ජනාධිපතිවරණයට ඉදිරිපත් වන අපේක්ෂකයන්ගේ පෙර වැරදි පිළිබද සොයා බලා ඡන්දය දෙන ලෙසත් පෙම්වතියගේ වුවත් පැටිකිරිය සොයා බැලිය යුතු බැවින් වැරදි අඩුම පුද්ගලයා තෝරාගැනීමටත්, අතීතය මතක තබාගෙන ඡන්දය දීමටත් ජනතාව මතක තබාගත යුතු බව ද රන්ජන් රාමනායක මහතා එහිදී වැඩිදුරටත් කියාසිටියේ ය.
විභාගයෙන් පසුව අමාත්‍යවරයා සිසු දරුවන් ගුරුවරුන් සමග සෙල්ෆි ඡායාරෑප කිහිපයකට ද පෙනී සිටියේ ය.
