තරුණ හා නවක ව්‍යවසායකයින්ට අවශ්‍ය ව්‍යාපාරික හා තාක්ෂණික දැනුම ලබාදීම සඳහා ” සිටි බැංකුව ” විශේෂ වැඩසටහනක් ආරම්භ කර ඇත.
මේ යටතේ මෙරට පළාත් නවයම නියෝජනය වන පරිදි ගම්බද තරුණ තරුණියන් ඒකරාශි කොට ඔවුන්ගේ ව්‍යවසායකත්ව නැංවීමට හා තාක්ෂණික දැනුම ලබා දීම සඳහා තරුණ කඳවුරු පිහිටුවීමට සිටි බැංකුව පියවර ගෙන ඇත .
මෙම තරුණ කඳවුරු වෙත විදෙස් දේශකයින් ගෙන්වා තරුණ ප්‍රජාවගේ දැනුම තවදුරටත් පුළුල් කිරීමටද කටයුතු සැලසුම් කර ඇත.
මේ පිළිබඳව වැඩිදුර අදහස් දක්වන සිටි බැංකුවේ ප්‍රධාන විධායක නිලධාරි රවීන් බස්නායක මහතා මෙසේ සඳහන් කර සිටී .
මේක තරගාවලියක් ලෙසයි පැවැත්වෙන්නේ . අවසාන වටවලට එද්දි ඔවුන්ගේ ව්‍යාපාරවලට මුල පුරන්න අවශ්‍ය ප්‍රාග්ධනය ලබා දෙනවා. මේ වැඩසටහන අපි නම් කොට තිබෙන්නේ ‘යූත් කෝ – ලැප්’ නමින්. එම තරනගයට එක්වන, දෙදෙනකුට අවස්ථාව ලැබෙනවා ආසියාවේ ‘යූත් කෝ – ලැප්’ සම්මේලනයට සහභාගි වෙන්න.
සිටි බැංකුවේ අනෙකුත් සමාජ සත්කාරයන් පිලිබඳ වැඩිදුරටත් සඳහන් කරමින් ඒ මහතා මෙසේද පැවසීය
අලුත් ව්‍යවසායකයන්ට අවශ්‍ය තොරතුරු තාක්ෂණික දැනුම ලබා දීමට දින දෙකක වැඩසටහනක්ද අප ක්‍රියාත්මක කරනවා. තරුණ සේවා සභාව සමඟ අත්වැල් බැඳගෙන කරන මේ වැඩසටහනේදි මූල්‍ය සාක්ෂරතාව පිළිබඳ දැනුම ලබා දෙන්න සිටි බැංකුව මූලිකව කටයුතු කරනවා. මේ රටේ 5000 කට අධික තරුණ පිරිසක් මේ වන විට දැනුමින් සන්නද්ධ කොට තිබෙනවා. රට තුළ පොදු ජනතාව සමඟ මූල්‍ය ගනුදෙනු නොකළාට, අපි තරුණ ව්‍යවසායකත්වය නඟා සිටුවන්න කරන මෙහෙවරෙන් බිදක් විතරයි මේ.
ජාත්‍යන්තරය හා ගනුදෙනු කරන ව්‍යාපාරික ප්‍රජාව ඉලක්ක කර ගොඩනැංවී ඇති සිටි බැංකුව මේ වනවිට 40 වසරක් මෙරට ව්‍යාපාරික ප්‍රජාව සමග ගනුදෙනු කරයි.
ඇමෙරිකාව කේන්ද්‍ර කරගත් ජාත්‍යන්තර බැංකුවක් වන සිටි බැංකුවට වසර දෙසිය දහයක් ඉපැරැණි ඉතිහාසයක් ඇත.
ලෝකයේ රටවල් 96ක, බල ප්‍රදේශ 168ක් පුරා සිටි බැංකු ශාඛා ඇති මෙය ඇමෙරිකාවේ ‘සිටි ගෲප්’ ව්‍යාපාර සමූහයට අයත්වුවකි.
