යුද හමුදා කොමාන්ඩො බළකායේ 40 වැනි සංවත්සරයට නිමිත්තෙන් පැවැත්වෙන කොමාන්ඩො පා සටහන් (Commando Footslog) ලබන 05 වැනිදා ආරම්භ වේ.
ගාල්ල,මහනුවර,හලාවත සිට මාර්තු 05 වැනිදා සිට පා ගමනින් කොළඹ බලාපැමිණෙන කොමාන්ඩො සෙබළුන් 07 වැනිදා කොළඹට ළගාවන අතර 08 වැනිදා ගාලු මුවදොර පිටියේදී ‘යුගයේ ත්‍රාසජනකම හෝරා තුන’ මැයෙන් සංදර්ශනයක් පැවැත්වීමට සුදානම් කර තිබේ.
කොමාන්ඩො සටන්, පැරිෂුට් සංදර්ශන, ප්‍රභූ ආරක්ෂක නිරූපනයන්, ප්‍රාණ ඇපකරුවන් මුදා ගැනීම ඇතුළු නිරූපන අවස්ථා රැසක් මෙම සංදර්ශනයට ඇතුළත්ය.
මාර්තු 08 වැනිදා ගාලුමුවදොර පිටියේදී සවස 3ට මෙම සංදර්ශනය ආරම්භවන අතර එය මුළුමනින්ම ජනතාවට නොමිලේ නැරඹීමට අවස්ථාව සලසා ඇත.
තිස් වසරක යුද ගිනි නිවා දැමු හමුදා මානුෂීය මෙහෙයුමේ සුවිශේෂී කාර්ය භාරයක නියැලුණු කොමාන්ඩො සෙබළුන්ට ගෞරවයක් ලෙස 08 වැනිදා සවස 03ට ගාලු මුවදොරට පැමිණෙන්නැයි කොමොන්ඩො බළකාය මහජනතාව දැනුවත් කරයි.
