ජාත්‍යන්තර වෙළඳාමේදී වානිජ්‍ය ගනුදෙනුවලදී මෙන්ම ආයෝජනයන්හීදී ද ඉදිරියේදී ඇමෙරිකානු ඩොලරය භාවිතා නොකිරීමට චීනය, රුසියාව සහ පාකිස්තානය ඇතුළු ෂැංග්හයි සහයෝගිතා සංවිධානයේ (SCO) සාමාජික රටවල් අට තීරණය කර ඇත.
ඒ අනුව ඉදිරියේදී මෙවැනි ගනුදෙනුවලදී දේශීය සහ ජාතික මුදල් භාවිතා කිරීමී මූලික ප්‍රතිපත්තිමය තීරණයකට මෙම රටවල් එළඹ ඇත.
ෂැංග්හයි සහයෝගිතා සංවිධානයේ වත්මන් සභාපතිත්වය දරන රුසියාව සමාජික රටවල් අතර වෙළදාම සහ ආයෝජනයන් මෙලෙස දේශීය මුදල් භාවිතයෙන් සිදු කිරීම සම්බන්ධව යෝජනා ඉදිරපත් කර ඇති අතර , සාමාජික රටවල් වන චීනය, ඉන්දියාව, පාකිස්තානය, කිර්ගිස්තානය, රුසියාව, ටජිකිස්තානය සහ උස්බෙකිස්තානය යන රටවල නියෝජිතයින් ඊට එකඟතාව පළකර ඇත.
ඊට අමතරව ඉරානය, ඇෆ්ගනිස්ථානය, බෙලාරුස් සහ මොන්ගෝලියාව යන රටවල් සංවිධානයේ නිත්‍ය සාමාජිකයෙකු වීමට අපේක්ෂා කරමින් සිටී.
මෙලෙස ෂැංග්හයි සාමාජික රටවල් අතර වෙළඳ හා ආයෝජන වලදී ඩොලර් සහ පවුම් වෙනුවට ජාතික මුදල් භාවිතය ආරම්භ වුවහොත් එය විශාල ඉදිරි ගමනක් වනු ඇතැයි ආර්ථික විශේෂඥයින් පවසති.
එය සාමාජික රටවල ජාතික මුදල් ශක්තිමත් කිරීම සහ අන්‍යෝන්‍ය වෙළඳාම සහ ආයෝජන ප්‍රවර්ධනය කිරීමද දායක වනු ඇත.
