ස්විට්සර්ලන්තයෙන් පැමිණි දේවගැතිවරයාගෙන් කොවිඩ් 19 වෛරසය වැලදුණු පුද්ගලයා පදිංචිව සිටින යාපනයේ උඩුවිල් ප්‍රාදේශිය ලේකම් කොට්ඨාශයට අයත් තාවඩි ප්‍රදේශයේ ජනතාව නිවාසවලටම කොටුකර තැබීමට සෞඛ්‍ය අංශ සහ පොලීසිය පියවර ගෙන තිබේ.
ඒ අයට අවශ්‍ය ආහාරපාන ඇතුළු අත්‍යවශ්‍ය ද්‍රව්‍ය නිවාසවලටම ලබාදෙනබවත් ඇදිරි නීතිය අවසන් වූවත් ඔවුන්ට නිවෙස් වලින් පිටතට පැමිණිමට ඉඩනොදුන් බවත් පොලීසිය කියයි.
මේ වන විට එම ප්‍රදෙශයේ පවුල් 300 ක් පමණ සිය නිවාසවලම රදවා නීරෝධායන කටයුතුවල නිරත වන බව යාපනය නියෝජ්‍ය පොලිස්පති මහේෂ් සේනාරත්න මහතා සදහන් කළේය.
ඒ අයගෙන් කිසිවෙකුටත් මෙතෙක් කොවිඩ් 19 වෛරසය ආසාධනය වී ඇති බව වාර්තා නොවූවන බවද ඔහු කීය.
ස්විස් දේවගැතිවරයාගේ දේවමෙහෙයට සම්බන්ධ වූ 2012 දෙනෙක් මේ වන විට හදුනාගෙන ඔවුන්ගේ නිවාසවලම නීරෝධායන කටයුත්තට යොමුකර ඇති බවත් ඒ අයගෙන් 17 දෙනෙක් දේවගැතිවරයා සහ කොරෝනා රෝගය වැලදී සිටින තාවඩි ප්‍රදේශයේ පදිංචිකරු සමග ඉතා කිට්ටුවෙන් ඇසුරු කළ අය බව හදුනාගෙන ඇති බවත් යාපනය දිස්ත්‍රික් ලේකම් කේ. මහේෂන් මහතා සදහන් කළේය.
එම 17 දෙනාව නීරෝධායන මධ්‍යස්ථානයකට යොමුකර ඇතැයිද දිස්ත්‍රික් ලේකම්වරයා පැවැසීය.
දේවගැතිවරයාගෙන් රෝගය වැලදුණු බව සදහන් වනපුද්ගලයාගේ බිරිද සමෘද්ධි නිලධාරිනියක් බවත් ප්‍ර දේශියේ පුද්ගලයින් 214 දෙනෙකුට ඇය විසින් සමෘද්ධි දීමනාලබාදී ඇති බැවින් එම සමෘද්ධි ලාභීන්ද ස්වයං නීරෝධායන ක්‍රියාවලියට යොමුකර ඇතැයිද දිස්ත්‍රික් ලේකම්වරයා පැවැසීය.
