Featured

Share now!

පසුගිය රජය සමයේ සිගරට් කර්මාන්තයට අදාලව ක්‍රියාත්මක කල වැරදි බදු ප්‍රතිපත්ති හේතුවෙන් රටට අහිමිවූ බදු මුදල් ප්‍රමාණය රුපියල් බිලියන 100කට ආසන්න බව මද්‍යසාර හා මත්ද්‍රව්‍ය තොරතුරු මධ්‍යස්ථානය නිකුත් කල නවතම සමීක්ෂණ වාර්තාවකින් අනාවරණය වී ඇත.

පසුගිය රජය සමයේ මෙම නිවැරදි නොවූ ප්‍රතිපත්ති හේතුවෙන් එම කාලය තුල දුම්කොළ සමාගමේ වාර්ෂික ශුද්ධ ලාභය රුපියල් මිලියන 170000 ඉක්මවා ඇති බවද මෙම සමීක්‍ෂණ වාර්තාව පෙන්වාදේ.

විවිධ රජයන් වල විවිධ මුදල් අමාත්‍යවරුන් යටතේ බ්‍රිතාන්‍ය ඇමරිකානු දුම්කොළ සමාගමේ ලාභය ඉහල ගොස් ඇති ආකාරය මෙම වාර්තාවේ දක්වා ඇත.

ඒ අනුව එම සමාගම වැඩිම ලාභයක් ලබා ඇත්තේ , රවී කරුණානායක මහතා හා මංගල සමරවීර මහතා මුදල් අමාත්‍යධූරයන් දැරූ පසුගිය රජය සමයේ බවද තහවුරුවී ඇත.

ශ‍්‍රි ලංකාවේ සිගරට් කර්මාන්තය ඒකාධිකාරියක් වන බැවින් සිගරට්වල බදු ප‍්‍රමාණය සහ වෙළදපොළ මිල යන දෙකම වසර 2005 දක්වාම රජය විසින් තිරණය කිරීම නිවැරදිව සිදුකර ඇත, නමුත් එතැන් සිට යම් යම් අඩුපාඩු රැසක් සිදුව ඇති අතර එය පසුගිය රජය සමයේ බරපතල මට්ටමකට පැමිණ ඇති බවද සමීක්ෂණ වාර්තාවේ දක්වා ඇත .

තම සමීක්ෂණ වාර්තාව පිළිබඳව අදහස් දක්වමින් මද්‍යසාර හා මත්ද්‍රව්‍ය තොරතුරු මධ්‍යස්ථානය මෙසේද නිවේදනය කර ඇත.

‘මහජනයා විසින් පත්කරගත් රජයක් කළ යුතුව ඇත්තේ, රටට වාසිදායක ලෙස ආර්ථික ප‍්‍රතිපත්ති සකස්කිරීම හා විදේශීය සමාගම් හා ව්‍යාපාරික ලෝකයට අවශ්‍ය ආකාරයට රටේ සම්පත් පිටරටවලට ඇදගැනීම වැළැක්වීමය.

සිගරට් බදු සම්බන්ධ මෙම ක‍්‍රියාවලියේදී මහජන මුදල්වලින් යැපෙන මුදල් අමාත්‍යංශයේ නිලධාරීන්ගේ සහ දේශපාලඥයින්ගේ මූලික වගකීම් පැහැර හැරීමක් සිදුවී ඇති බව පැහැදිලිය.

මෙවර පාර්ලිමේන්තු මැතිවරණයට තරග කරන අපේක්‍ෂකයින් හා දේශපාලන පක්ෂ මේ තත්වය වෙනස් කිරීමට ගන්නා ක‍්‍රියාමාර්ග මොනවාදැයි මහජනතාවට පැහැදිලි කළ යුතුය.

එසේ කිරීම අතිශයින් වැදගත්වන්නේ, මෙම කරුණු මත තීරණගන්නා සැලකිය යුතු ඡන්ද දායකයින් ප‍්‍රමාණයක් විමසිල්ලෙන් බලා සිටින බැවිනි.

Leave a Reply

Your email address will not be published. Required fields are marked *

Post comment