හිටපු අමාත්‍ය පාර්ලිමේන්තු මන්ත්‍රී රිෂාද් බදියුදීන් මහතා විසින් මන්නාරම දිස්ත්‍රික්කයේ ඉඩම් අක්කර 3000කට වැඩි ප්‍රමාණයක් අත්පත් කරගත්තේ කෙසේද යන්න පිළිබඳ තොරතුරු රැසක් මුල්‍ය අපරාධ කොට්ඨාශය වෙත අනාවරණය වී තිබේ.
ඒ හිටපු ඇමති රිෂාද් බදියුදීන් විසින් අත්තනෝමතික ලෙස ඉඩම් අත්පත් කරගෙන ඇතැයි ලද පැමිණිල්ලක් පිළිබඳ විමර්ශන කරන අතරතුරදීය.
රිෂාද් බදියුදීන් හා ඔහුගේ පවුලේ ඥාතීන් විසින් මෙම ඉඩම් කරගෙන ඇති ආකාරය ගැන තොරතුරු හා සාක්ෂි විශාල ප්‍රමාණයක් හෙළි කරගෙන ඇතැයි FCID ආරංචි මාර්ග පවසයි.
ඉඩම් හිමිකරුවන් රවටා ගැනීම, මැර බලයෙන් ඉඩම් අත්පත් කරගැනීම, ඥාතීන්ගේ නම්වලින් මිලදී ගැනීම, රජයට පවරා ගන්නා බවට අසත්‍ය පවසා මිනිසුන් ඉවත් කර ඉඩම් ගැනීම ආදි ක්‍රම අනුගමනය කරමින් රිෂාද් බදියුදීන් ඇතුළු පවුලේ අයවිසින් ඉඩම් අත්පත් කරගත් බවට මෙහිදී හෙළිවී තිබේ. මේ පිළිබඳ තවදුරටත් විමර්ශනය සිදුකෙරෙමින් පවතී.
එලෙස බලහත්කාරයෙන් අත්පත් කරගත් ඉඩම් මේ වනවිට හඳුනාගනිමින් සිටින බව වාර්තා වේ.
