හංවැල්ලේ වෙඩිතැබීමකින් සිදුවූ ඝාතනයට යොදාගත් වෑන් රථය හා පුද්ගලයන් දෙදෙනෙකු තලංගම කුමාරවත්ත ප්‍රදේශයේ වැඩබිමකදී පොලිස් අත්අඩංගුවට ගෙන තිබේ.
හංවැල්ල ඇඹුල්ගම දී මෙම වෙඩිතැබීම සිදුවූ ස්ථානයේදීම පසුගිය වසරේ ඔක්තෝබරයේ පුද්ගලයකු කපාකොටා ඝාතනය කර තිබුණේ ඊයේ සිදුවීමෙන් ඝාතනයට ලක්වූ පුද්ගලයා විසිනි.
එම ඝාතනය සම්බන්ධයෙන් සිරගතව සිට නිදහස්ව පැමිණ මාසයක් ගතවන්නටත් පෙර 24 හැවිරිදි ඉඳුනිල් හෙවත් ඉන්ද්‍රා නමැත්තා මෙලෙස වෙඩිවැදීමෙන් මියගොස් ඇත.
පසුගිය වසරේ දී එලෙස ඝාතනයට ලක්ව ඇත්තේ දැනට බන්ධනාගාරගතව සිටින පාතාල සාමාජික ඌරුජුවා නමැත්තාගේ ගෝලයෙකි.
ඊට පලිගැනීමක් ලෙස ඊයේ වෙඩිතැබීමේ සිද්ධිය මෙහෙයවා ඇත්තේ ඌරුජුවා විසින් බවට මුලික පරීක්ෂණයේදී හෙළිවී තිබේ.
ඝාතකයන් ඊයේ රාත්‍රියේ එම ස්ථානයට යතුරුපැදියකින් හා වෑන් රථයකින් පැමිණ තිබේ.
එතැන පිහිටි වඩේ කරත්තයක් ළඟ නැවතී සිටිමින් ඉන්ද්‍රා එනතුරු ඝාතකයන් රැක සිට ඇත.
ඉලක්කගත පුද්ගලයා පැමිණි පසු යතුරුපැදියෙන් ආ පුද්ගලයන් හා කුලියට ගත් වෑන් රථයෙන් ආ පුද්ගලයන් එක්ව එහි පැමිණි පුද්ගලයන් තිදෙනාට වෙඩි තබා තියුණු ආයුධවලින් කපා කොටා ඇත.
සිද්ධිය සම්බන්ධයෙන් සෙසු සැකකරුවන් අත්අඩංගුවට ගැනීමේ විමර්ශන දියත් වෙයි.
