දියුණු රටක් ගොඩනැඟීමට රාජ්‍ය සේවයේ පවතින සියලු දුර්වලතා කඩිනමින් නිවරැදි කළ යුතු බවත්, ආකල්පමය වෙනසක් තුළින් කාර්යක්ෂම සහ විධිමත් රාජ්‍ය සේවයකට කැපවිය යුතු බවත් ජනාධිපති ගෝඨාභය රාජපක්ෂ මහතා පවැසීය.
රාජ්‍ය අමාත්‍යාංශ සඳහා පත් කෙරුණු නව ලේකම්වරු ඊයේ (09) පස්වරුවේ ජනාධිපති කාර්යාලයේ දී සිය පත්වීම් ලිපි ලබා ගත් අතර ඉන් අනතුරුව ඔවුන් අමතමින් ජනාධිපතිවරයා මේ බව ප්‍රකාශ කළේය.
රාජ්‍ය සේවය විධිමත්ව සහ කාර්යක්ෂමව ඉදිරියට පවත්වාගෙන යාමේදී නවීන තාක්ෂණය උපරිමයෙන් භාවිත කළ යුතු බවත් රාජ්‍ය ව්‍යුහය වංචාවෙන් දූෂණයෙන් තොරව නිවැරදි යාන්ත්‍රණයක් ලෙස ක්‍රියාත්මක වීමේ වැදගත් බවත් ජනපතිවරයා පැහැදිළි කළේය.
තම ප්‍රතිපත්ති ප්‍රකාශය මඟින් රටේ සෑම අංශයක් කෙරෙහිම අවධානය යොමු කර තිබෙන බව පැවසු ජනාධිපතිවරයා එම වගකිම් ඉටුකිරීමේ දී සෑම අමාත්‍යාංශයකටම පැවරෙන කාර්යභාරය සුවිශාල බවත්, අමාත්‍යාංශ මට්ටමින් නිසි ලෙස වගකීම් ඉටු කරමින් වත්මන් රජය කෙරෙහි ජනතාව තැබූ අපේක්ෂා සපුරාලීමට සියලු දෙනා වගකීමෙන් ක්‍රියා කරනු ඇතැයි ද විශ්වාසය පළ කළේය.
