ඉකුත් ජනාධිපතිවරණ සමයේදී සුදුවෑන් රියදුරන් බව පවසමින් හිටපු ඇමති රාජිත සේනාරත්න මහතා විසින් ව්‍යාජ රැවුල් දමා මාධ්‍ය හමුවට ගෙන ආ පුද්ගලයන් දෙදෙනා අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් විසින් අවන්හලක දී අත්අඩංගුවට ගෙන තිබේ.
ඒ ඊයේ රාත්‍රි මහර කඩවත පාරේ අවන්හලක දී මොවුන් රැඳී සිටියදීය.
මොවුන් දෙදෙනා ලෝක හොරුන් දෙදෙනෙකු බවත් එක් අයෙක් බැංකු කොල්ලකෑම් ඇතුළු කොල්ලකෑම් 12කට සම්බන්ධ බවට අනාවරණය වී ඇත.
සැකකරුවන් දෙදෙනා සම්බන්ධයෙන් දිගින් දිගටම ‘ද කලම්බෝ එක්ස්ප්‍රස්’ අප විසින් තොරතුරු අනාවරණය කළේය.
මූලික ප්‍රශ්න කිරීම් හමුවේ සැකකරුවන් අනාවරණය කර ඇත්තේ රාජිත සේනාරත්න මහතාගේ කීමට තමන් මාධ්‍ය හමුවට පැමිණි බවයි.
තමන්ට එරෙහිව ඇති අපරාධ චෝදනාවලින් නිදහස් කරන බවට රාජිත සේනාරත්න මහතා පොරොන්දු වීම නිසා මාධ්‍ය හමුවට පැමිණි බව ඔවුන් අනාවරණය කළ බව රහස් පොලිස් අභ්‍යන්තර ආරංචි මාර්ග පැවැසීය.
