වව්නියාව බෝගස්වැව හමුදා කඳවුරේ සේවය කරන හමුදා සෙබළකුට පිහියෙන් ඇන ඔහු සතු ටී56 ගිනිඅවිය අද අලුයම පැහැරගැනීමට ලක්විය.
එම සිද්ධිය මහත් ආන්දෝලනයකට තුඩු දුන් සිද්ධියක් බවට පත්ව තිබුණි.
පැය කිහිපයක් අතරතුර ගිනිඅවිය පැහැරගැනීමේ අභිරහස විසඳාගැනීමට සමත්ව ඇත.
එම අවිය පැහැරගෙන ගොස් තිබුණේ එම කඳවුරේම සේවය කරන හමුදා සෙබළෙක් විසිනි.
නිවාඩු ලබාසිටි ඔහු පෙරදින කඳවුරට පැමිණ ඊයේ අලුයම සෙබළාට පහරදී ගිනිඅවිය පැහැරගෙන ඔහු පදිංචිව සිටින කැකිරාවට පලාගොස් තිබේ.
පහරකෑමට ලක්වූ සෙබළා කඳවුරේ ආරක්ෂාවට ඇති මුරපොලේ සේවය කොට අලුයම සේවාමුරය අවසන් කොට ගිනිඅවිය ගබඩාවට භාරදීමට යමින් සිටියදී ඔහුට එම ප්‍රහාරය එල්ල වී තිබේ.
ඒ සම්බන්ධයෙන් හමුදා බුද්ධි අංශ විසින් කරුණු සොයාබැලීමේ දී පෙරදින කඳවුරේ සිටි නිවාඩු ලබාසිටි සෙබලා අතුරුදන් වී ඇති බව අනාවරණය වීමත් සමග ඒ ගැන විමසිලිමත් වීමේදී ගිනිඅවිය පැහැරගත්තේ ඔහු විසින් බවට අනාවරණය වී තිබේ.
ඒ අනුව යුද හමුදා පොලීසිය විසින් ඊයේ දහවල් කැකිරාවේ දී ගිනිඅවියක් සමග ඔහු අත්අඩංගුවට ගෙන තිබේ.
