පොලිස් විශේෂ කාර්ය බළකායේ නව ප්‍රධානියා ලෙස නියෝජ්‍ය පොලිස්පති ලයනල් ගුණතිලක මහතාගේ නම ජාතික පොලිස් කොමිසම විසින් නිර්දේශ කොට ඇති බව ආරංචි මාර්ග අනාවරණය කළේය.
ජාතික පොලිස් කොමිසම විසින් දීර්ඝ ලෙස කරුණු අධයනය කිරීමකින් පසු එම නිර්දේශය ඊයේ වන විට වැඩබලන පොලිස්පතිවරයාට යොමුකර ඇත.
ලයනල් ගුණතිලක මහතා පොලිස් විශේෂ කාර්ය බළකායේ නියෝජ්‍ය අණදෙන නිලධාරියා ලෙස මේ වන විට සේවයෙහි නිරතව සිටී.
පොලිස් විශේෂ කාර්ය බළකායේ බුද්ධි අධ්‍යක්ෂවරයා ව සිටි බස්නාහිර උතුර නියෝජ්‍ය පොලිස්පති වරුණ ජයසුන්දර මහතාගේ නමද විශේෂ කාර්ය බලකා නව ප්‍රධානියා ලෙස පත් කරනු ඇති බවට කියැවිණි.
මේ දෙදෙනා සම්බන්ධයෙන් දීර්ඝ ලෙස කරුණු අධ්‍යයනය කිරීමකින් අනතුරුව ලයනල් ගුණතිලක මහතා ගේ නම නිර්දේශ කිරීමට ජාතික පොලිස් කොමිසම පියවර ගෙන ඇත.
ලයනල් ගුණතිලක මහතාගේ වයස අවුරුදු 60 සම්පූර්ණ වී පොලිස් සේවයෙන් විශ්‍රාම ගැනීමට නියමිතව ඇත්තේ 2023 වසරේ දී ය.
වරුණ ජයසුන්දර මහතා විශ්‍රාම ගැනීමට නියමිතව ඇත්තේ 2036 වසරේ දී ය.
