කොරෝනා වෛරසයට එරෙහිව එන්නතක් නිපදවීම සඳහා ශ්‍රී ලංකාවේ හා බ්‍රිතාන්‍යයේ වෛද්‍ය විශේෂඥයින් පිරිසක් ඒකාබද්ධ වැඩසටහනක් ආරම්භ කර ඇත. මේ අනුව ශ්‍රී ලංකාවේ ශ්‍රී ජයවර්ධනපුර විශ්වවිද්‍යාලයේ හා බ්‍රිතාන්‍යයේ ඔක්ස්ෆර්ඩ් විශ්වවිද්යාලයද මෙම වැඩසටහනට සමගාමීව ඒකාබද්ධ පර්යේෂණ ආරම්භ කර ඇත.
මෙම පර්යේෂණ සාර්ථක කර ගැනීම සඳහා බ්‍රිතාන්‍ය රජය මූල්‍යාධාර සපයන අතර මෙම සතියේද ඒ සඳහා අලුතින් රුපියල් මිලියන දහයක මුදලක් ලබාදීමට එරට රජය පියවර ගෙන ඇත . මෙහිදී විවිධ ජන කොටස්වලට අයත් කොරෝනා ආසාධිතයින් එම වෛරසයට දක්වන ප්‍රතිශක්තීකරණ ප්‍රතිචාර පිළිබඳවද පුළුල්ව පර්යේෂණයට ලක්කිරීමට සැලසුම් කර ඇත .
මෙම පර්යේෂණ සඳහා ඉදිරියටත් අවශ්‍ය මූල්‍යාධාර ලබාදීමට තම රජය සූදානම් බවත් , මෙම පර්යේෂණ හරහා කොරෝනා වසංගතයට එරෙහිව සාර්ථක ප්‍රතිඵලයක් ලබාගැනීමට හැකිවනු ඇතැයි අපේක්‍ෂා කරන බවත් මෙරට බ්‍රිතාන්‍ය මහකොමසාරිස් සාරා හුල්ටන් මහත්මිය සඳහන් කර ඇත .
