එක්සත් ජාතික පක්ෂය විසින් සාමාජිකයන් 99 දෙනෙකුගේ පක්ෂ සාමාජිකයත්ව අත්හිටුවීමට ගෙන ඇති තීරණය ක්‍රියාත්මක කිරීම වළක්වාලමින් වාරණ නියෝගයක් නිකුත් කරන ලෙස සමගි ජන බලවේගයේ විසින් සිදුකළ ඉල්ලීම කොළඹ දිසා අධිකරණය ප්‍රතික්ෂේප කර ඇත.
පක්ෂ සාමාජිකත්වය අත්හිටුවීමට එරෙහිව සමගි ජන බලවේගයේ මහා ලේකම්රං ජිත් මද්දුමබණ්ඩාර මහතා විසින් ගොනුකළ නඩුව කොළඹ දිසා විනිසුරු අමාලි රණවීර මහත්මිය ඉදිරියේ අද කැඳවා තිබිණි.
එහිදී විනිසුරුවරිය අවධාරණය කළේ වාරණ නියෝගයක් අයැද සිටීමේදී පැමිණිලි පාර්ශ්වය විසින් සත්‍ය කරුණු අධිකරණයට අනාවරණය කිරීම අවශ්‍ය බවයි. එම අවශ්‍යතාවය මෙහිදී අවධාරණය වී නොමැති හෙයින් වාරණ නියෝගයක් නිකුත් කළ නොහැකි බවයි විනිසුරුවරිය ප්‍රකාශ කළේ.
එජාප නායක රනිල් වික්‍රමසිංහ මහතා, උප නායක රවී කරුණානායක මහතා, මහ ලේකම් අකිල විරාජ් කාරියවසම් මහතා ඇතුළු පිරිසක් මෙහි වගඋත්තරකරුවන් ලෙස නම්කර ඇත.. මෙම නඩුව ජූලි මස 27 වැනිදා දක්වා කල්තැබූ විනිසුරුවරිය නියෝග කළේ එදින අධිකරණයේ පෙනී සිටින්නැයි වගඋත්තරකරුවන්ට නොතීසි නිකුත් කරන ලෙසයි.
