ශ්‍රී ලංකාවේ අඩු පහසුකම් සහිත දුෂ්කර හා ග්‍රාමීය ප්‍රදේශවල ඩිජිටල් සේවා සම්බන්ධතා වඩාත් ඉහළ මට්ටමකට ගෙන එන ලෙස, ශ්‍රී ලංකා විදුලි සංදේශ නියාමන කොමිෂන් සභාව, දුරකතන සේවා සපයන සමාගම්වලට උපදෙස් දී ඇත.
භූගෝලීය බාධක නොතකා දිවයින පුරා ඩිජිටල් සේවා වෙනුවෙන් ප්‍රවේශවීම සහතික කිරීම සඳහාත්, 4G බ්‍රෝඩ්බෑන්ඩ් ආවරණය ශ්‍රී ලංකාව පුරා ස්ථිර කිරීම සඳහාත් වහාම පියවර ගන්නා ලෙසද කොමිෂන් සභාව මෙහිදී දැනුම් දී ඇත.
විදුලි සංදේශ නියාමන කොමිෂන් සභාව ආරම්භ කළ “ගමට සන්නිවේදනය” නම් නව ව්‍යාපෘතිය යටතේ මෙම දැනුම් දීම් සිදුකර ඇත.
සියලු දිස්ත්‍රික්ක ආවරණය වන පරිදි කරන ලද බිම් මට්ටමේ සමීක්ෂණයක් මගින් ශ්‍රී ලංකා විදුලි සංදේශ නියාමන කොමිසම විසින් අඩු පහසුකම් සහිත බවට හඳුනාගෙන ඇති ප්‍රදේශ සඳහා මෙහිදී වැඩි අවධානයක් යොමුකර ඇත
