කොවිඩ් ආසාදිත මවක් විසින් බිහිකළ දරුවාට වෛරසය ආසාදනය වී නැති බව ඇය ප්‍රතිකාර ලබන නැගෙනහිර කොළඹ මූලික රෝහලේ අධ්‍යක්ෂවරයා අනාවරණය කර ඇත.
පසුගිය සිකුරාදා (31) ශ්‍රී ලංකාව තුළ ප්‍රථම වරට කොවිඩ් ආසාදිත මවක් විසින් දරුවෙකු බිහි කළ අතර මෙම සිසේරියන් සැත්කම සඳහා වෛද්‍යවරුන් ඇතුළු කාර්ය මණ්ඩලය සාමාජිකයින් 35 දෙනකු සහභාගි වීම විශේෂත්වයක් විය ..
ඩුබායිහි සිට පසුගිය 10 වැනි දා මෙරටට පැමිණි මෙම ගර්භනී මව කන්දකාඩු නිරෝධායන මධ්‍යස්ථානයට යොමු කර ඇති අතර එහිදී කළ පීසීආර් පරීක්ෂණයේ දී ඇයට කොවිඩ් නයින්ටීන් ආසාදනය වී ඇති බවට තහවුරු වී තිබේ.
පසුගිය 23 වැනිදා මෙම ඒකකයට ඇතුළත් කළ ඇය සිකුරාදා (31) පස්වරුවේ ප්‍රසූත වේදනාවෙන් සිටින බවට වෛද්‍යවරුන් නිරීක්ෂණය කර තිබුණි.
ඒ අනුව කොවිඩ් ආසාදිතව ප්‍රතිකාර ලබමින් සිටින ගැබිණි මවක් මෙරට දී දරුවකු බිහිකළ ප්‍රථම අවස්ථාව මෙය වේ.
පසුව නිරෝගී තත්ත්වයේ සිටියද දරුවාගේ ජෛව සාම්පල කොවිඩ් පරීක්ෂණ සඳහා යොමුකර තිබුනු අතර .
එහිදී එම දරුවාට කොවිඩ්-19 වෛරසය ආසාදනය වී නැති බව පරීක්ෂණවලින් තහවුරු වී තිබේ.
