පාස්කු ප්‍රහාරය සම්භන්ධව විමර්ශන පවත්වන ජනාධිපති කොමිසමේ කාලය ලබන 20වෙනි දින අවසන් වීමට නියමිතව ඇතත් , තවත් වැදගත් සාක්ෂිකරුවන් කිහිපදෙනෙකුගේ , සාක්ෂි විමසීමට ඇති බැවින් , කොමිසමේ කාලය තවත් මසකින් දීර්ඝ කරන ලෙසට ජනාධිපතිවරයාගෙන් ඉල්ලා ඇතැයි කොමිසමේ ආරංචිමාර්ග අනාවරණය කර සිටී .
කොමිසමේ පොලිස් ඒකකය විසින් මේ දක්වා පුද්ගලයින් 1600 කගෙන් පමණ ප්‍රකාශ සටහන් කරගෙන ඇත . නමුත් කොමිසම හමුවේ සාක්ෂි ලබාදී ඇත්තේ 500 කට ආසන්න පිරිසක් පමණි .
වසරකට වැඩි කාලයක් තිස්සේ මෙම පාස්කු කොමිසමේ සාක්ෂි විභාගය සිදුවන අතර අවස්ථා දෙකකදීම කොමිසමී කාලය දීර්ඝ කර ඇත .
කොමිසමේ කාලය දීර්ඝ කිරීම සම්භන්ධයෙන් මෙතෙක් ජනාධිපති කාර්යාලයෙන් නිළ දැනුම් දීමක් කර නැතත් , ලබන 21 වනදාද සාක්ෂි විමසීමට සාක්ෂිකරුවන් කැඳවා ඇත .
පාස්කු ප්‍රහාරය සම්බන්ධයෙන් විමර්ෂණ අධීක්ෂකයා වූ අපරාධ පරීක්‍ෂණ දෙපාර්තමේන්තුවේ හිටපු අධ්‍යක්‍ෂ ජ්‍යෙෂ්ඨ පොලිස් අධිකාරි ශානි අබේසේකර මහතාගෙන්ද මෙතෙක් කොමිසම සාක්ෂි විමසා නැත .
මේ දිනවල පාස්කු කොමිසම හමුවේ මෙතෙක් ඉදිරිපත් වූ සාක්ෂි සම්පිණ්ඩනය කරමින්, කොමිසම් වාර්තාවක් සකස්කෙරෙමින් ඇති බවද දැනගන්නට ඇත.
