දිවයිනටම පනවා ඇති සංචරණ සීමාවන් අද (25) අලුයම 4.00 ට ඉවත් කෙරේ. එහෙත් පළාත් අතර සංචරණ සීමාවන් ජුලි මස 05 වනදා දක්වා තවදුරටත් ක්‍රියාත්මක කෙරෙන බව කොවිඩ්-19 වැළැක්වීමේ ජාතික ක්‍රියාන්විත මධ්‍යස්ථානය පවසයි.
සංචරණ සීමා ඉවත් කෙරුණද ජනතාව සෞඛ්‍යය මාර්ගෝපදේශවලට අනුකූලව කටයුතු කළ යුතු බවත් එසේ කටයුතු නොකරන පුද්ගලයන්ට එරෙහිව නිරෝධායන පනත යටතේ දැඩි ක්‍රියාමාර්ග ගන්නා බවත් පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති නීතිඥ අජිත් රෝහණ මහතා පැවසීය.
කෙසේවෙතත් සංචරණ සීමා ලිහිල් වූ පසුව ජනතාව නොසැළකිලිමත් ලෙස හැසිරුණහොත් කොවිඩ් පැතිරීම වැඩිවනු ඇති බවත් දෛනිකව වාර්තාවන කොවිඩ් රෝගීන්ගේ වර්ධනයක් සිදු වුවහොත් ඉදිරියේදී දැඩි සංචරණ සීමාවන්ට යෑමට සිදුවන බව සෞඛ්‍ය සේවා අධ්‍යක්ෂ ජනරාල්, වෛද්‍ය අසේල ගුණවර්ධන කීය.
දැනට ක්‍රියාත්මක සංචරණ සීමාවල ප්‍රතිඵල මේ වනවිට විශ්ලේෂණය කරමින් පවතින අතර මින් ඉදිරියට සංචරණ සීමා පැනවෙන ආකාරය ඒ මත තීරණය වනු ඇති බව ද සෞඛ්‍ය සේවා අධ්‍යක්ෂ ජනරාල්, වෛද්‍ය අසේල ගුණවර්ධන අවධාරණය කළේය.
කෙසේවෙතත් දැනට හුදෙකලා කර ඇති ප්‍රදේශවල හුදෙකලා තත්ත්වය ඒ පිළිබද දැනුම් දෙනතෙක් තවදුරටත් ක්‍රියාත්මක වේ.
