* ලක්ෂ 12කට එන්නත් දී අවසන්ප්‍රබෝධා හෙට්ටිආරච්චි
අස්ට්‍රාසෙනිකා එන්නත පළමු මාත්‍රාව ලෙස ලබාගත් අයට දෙවැනි මාත්‍රාව ලෙස ෆයිසර් එන්නත ලබාදීම අද (7)සිට අරඹන බව ඖෂධ නිෂ්පාදන සැපයීම් හා නියාමන රාජ්‍ය අමාත්‍ය මහාචාර්ය චන්න ජයසුමන මහතා පැවසීය.
ඒ අනුව ඇස්ට්‍රාසෙනෙකා කොවිඩ් මර්දන පළමු එන්නත් මාත්‍රාව ලබාගත්, කොළඹ 01 සිට 15 දක්වා ප්‍රදේශවල අවුරුදු 55 ට වැඩි පුද්ගලයින්ට දෙවන මාත්‍රාව ලෙස ෆයිසර් එන්නත ලබාදීම අද සිට සිදුකෙරේ.
මේ අතර දිවයින පුරා පාසල්වල ගුරුවරුන් හා අනධ්‍යයන කාර්ය මණ්ඩල සාමාජිකයන්ට කොරෝනා එන්නත් ලබාදීම ද අද (07) සිට අරඹන බව අධ්‍යාපන අමාත්‍යාංශය පවසයි .
එන්නත් ලබාදීම අද සිට ආරම්භ කිරීමෙන් පසු එම වැඩපිළිවෙළ සති දෙකක පමණ කාලයක් දිගටම ක්‍රියාත්මක කිරීමට නියමිතය.
මේ අතර කොවිඩ් මර්දනය කිරීම සඳහා පූර්ණ එන්නතකරණයට ලක් කළ මෙරට පුද්ගලයින් ලක්ෂ 12 ඉක්මවා ගොස් තිබිණ.
ඊයේ උදෑසන වනවිට කොවිඩ් මර්දන එන්නත් මාත්‍රා දෙකම ලබාගත් හෙවත් පූර්ණ එන්නත්කරණයට ලක් කළ සංඛ්‍යාව 1269151ක් වන බව කොළඹ වසංගත රෝග විද්‍යා අංශය කියයි.
ඇස්ට්‍රාසෙනෙකා කොවිෂීල්ඩ් එන්නතේ මාත්‍රා දෙකම ලබාගත් පිරිස 384277ක් වන අතර සයිනෝෆාම් එන්නතේ මාත්‍රා දෙකම ලබාගත් පිරිස 870446ක් සහ ස්පුට්නික් එන්නතේ මාත්‍රා දෙකම ලබාගත් පිරිස 14428ක් බවද සෞඛ්‍ය අංශය දත්ත වාර්තා වල සඳහන් වේ.
