ප්‍රබෝධා හෙට්ටිආරච්චි
අමෙරිකාවට ඉස්සන් අපනයනය කරන ප්‍රධාන රටවල් ලැයිස්තුවට ශ්‍රී ලංකාව ප්‍රථම වතාවට ඇතුළත් වී තිබේ.
ධීවර කටයුතු රාජ්‍ය අමාත්‍ය කාංචන විජේසේකර මහතා පවසන්නේ මෙරට ඉස්සන් වගාව මේ වසරේදී සැලකිය යුතු ලෙස ඉහළ ගොස් ඇති බැවින් මෙම සාර්ථකත්වය අත්කරගැනීමට හැකිවූ බවය.
මෙම වසරේ මුල් මාස 6 තුළදී 2020 වසරේ ජනවාරි සිට දෙසැම්බර් දක්වා කාලයට සාපේක්ෂව දෙගුණයකටත් වඩා වැඩි ඉස්සන් අස්වැන්නක් අපනයනය කිරීමට ශ්‍රී ලංකා අපනයනකරුවන් සමත් වී තිබෙන බව ද හෙතෙම කියා සිටී.
මේ අනුව අමෙරිකාව විසින් ඉස්සන් ආනයනය කරනු ලබන ප්‍රධාන රටවල් 29 අතරට ශ්‍රී ලංකාව ද ඇතුළත් ව තිබේ.
මෙරට ඉස්සන් නිෂ්පාදන ඉතිහාසයේ ඉහළම නිෂ්පාදන වර්ෂය ලෙස දැනටමත් පත්වී ඇත්තේ මේ වර්ෂයයි.
පසුගිය වසර පුරාවට මෙරටින් ඉස්සන් අමෙරිකාව වෙත අපනයනය කර ඇත්තේ මෙට්‍රික් ටොන් 7360කි. එහෙත් මේ වසරේ ජනවාරි සිට ජුලි දක්වා කාලය තුළ පමණක් මෙට්‍රික් ටොන් 9410ක් දැනටමත් අපනයනය කර තිබේ.
අමෙරිකාවට ඉස්සන් අපනයනය කරන ප්‍රධානතම සැපයුම්කරුවා වන්නේ ඉන්දියාවයි.
