අසංක නවරත්න
දෝහා කටාර්හි හි අල්-වාබ් ප්‍රදේශයේ නිවාස සංකීර්ණයක ආරක්ෂක නිලධාරියෙකු ලෙස කටයුතු කරමින් සිටි ශ්‍රී ලාංකිකයකුට පසුගියදා (26) වෙඩි තබා ඝාතනය කර තිබේ.
එම නිවාස සංකීර්ණයට එරට තරුණයකු හා කාන්තාවක පැමිණ ඇති අතර ලාංකික ආරක්ෂක නිලධාරියා ඔහුගෙන් හැඳුනුම්පත ඉල්ලා ඇත. සාක්ෂිකරුවන් පැවසුවේ ඔහුගේ හැඳුනුම්පත ඉදිරිපත් නොකිරීම නිසා ආරක්ෂකයා විසින් ඇතුල්වීම ප්‍රතික්ෂේප කළ බවත්ය.
ඉන්පසුව අදාළ තරුණයා ආරක්ෂක නිලධාරියාට වෙඩි තබා පරිශ්‍රයෙන් පලා ගොස් ඇත. මෙම වෙඩිතැබීමෙන් ආරක්ෂක නිලධාරියාගේ සගයාට ද තුවාල සිදුවී ඇත.
කටාර් ජාතිකයකු බව කියන වෙඩික්කරුවා එක් වරකට වඩා වෙඩි තබා ඇති බව දුටුවෝ පවසති. කෙසේවෙතත් ප්‍රහාරයෙන් පසු වහාම පාහේ තුවක්කුකරු අත්අඩංගුවට ගැනීමට පොලිසියට හැකි වී ඇත.
ඔහු මේ වන විට රජයේ අභිචෝදකයා වෙත යොමු කරතිබේ. මියගිය ලාංකික ආරක්ෂකයා තිදරු පියෙකි. ඔහුගේ කොන්ත්‍රාත්තුව අවසන් වන බැවින් ඔහු නැවත සිය මව් රටට යාමට නියමිතව තිබුණි.
