ළමා මන්දපෝෂණ මට්ටම අනුව ශ්‍රී ලංකාව ලෝකයේ 7 වන ස්ථානයේ පසුවන බව යුනිසෙෆ් සංවිධාන වාර්තා මගින් පෙන්වා දී ඇතැයි රජයේ වෛද්‍ය නිලධාරීන්ගේ සංගමය පවසයි.
පවතින ආර්ථික තත්ත්වය හමුවේ මෙම තත්වය ඉදිරියේදී තවත් නරක අතට හැරීමට ඉඩ ඇතැයි අද පැවති මාධ්‍ය හමුවකදී එහි ලේකම් වෛද්‍ය හරිත අලුත්ගේ මහතා ප්‍රකාශ කළේ ය.
මෙරට තුළ සෑම වයස් ඛාණ්ඩයකටම අයත් පිරිස සමස්ත ජනගහනයෙන් 25%කට එනම් ලක්ෂ 50කට වැඩි ජනගහනයකට අද වනවිට මන්දපෝෂණ හා පෝෂණ ගැටලු උග්‍ර වෙමින් පවතින බව ඔහු කියාසිටී.
රටේ සෑම පවුල් 10කින් පවුල් 7කටම මතුවී තිබෙන ආර්ථික අර්බුදය හේතුවෙන් ආහාරවල ප්‍රමාණය හා ගුණාත්මකභාවය අඩු කිරීමට සිදුවීමේ ගැටලුවට මුහුණ පා ඇති බව ද හෙතෙම කීය.
පවතින තත්ත්වය යම් මට්ටමකින් හෝ කළමනාකරණය කර ගනිමින් පෝෂණ ගැටලුවල බලපෑම් අවම කර ගැනීමත් අනාගත පරපුර මන්දපෝෂණයේ ගොදුරු බවට පත් නොවීමත් සහතික කිරීම සදහා රජයේ වෛද්‍ය නිලධාරින්ගේ සංගමය රජයට පස් වැදෑරුම් යෝජනාවලියක්ද ඉදිරිපත් කර තිබේ.
