අගුරුවැල්ල වරකාපොල මාර්ගයේ කොස්වත්ත හන්දිය ආසන්නයේ තුඹලියද්ද ප්‍රදේශයේ පස්කන්දක් කඩාවැටීම නිසා සිරවී සිටි නිවසක පුද්ගලයින් සිව්දෙනෙකුගෙන් දෙදෙනකු මුදා ගැනීම සඳහා යුද හමුද‍ාවේ පිරිසක් සෝදිසි සහ මුදා ගැනීමේ මෙහෙයුමක නිරත වෙති.
පවතින අධික වර්ෂාපතනය හේතුවෙන් සිදුවූ මෙම නායයාමෙන් නිවසේ සුන්බුන් අතර සිටි එම පවුලේ පියා මුදාගෙන ප්‍රථිකාර සඳහා වරකාපොල රෝහල වෙත යොමුකර ඇත. එක දරුවකු උපකාර පන්තිවලට සහභාගි වීම නිසා දිවි බේරාගෙන තිබුණි. එම පවුලේ මව සහ තවත් දරුවකු ගලවා ගැනීම සඳහා අඛණ්ඩව කටයුතු සිදුකරමින් පවතී.
නිළධාරීන් ඇතුළු යුධ හමුදා සාමාජිකයින් 75 කට අධික පිරිසක් දිවි ගලවා ගත් අනෙකුත් පුද්ගලයින් සොයා පොළොව පිරිසිදු කිරීමේ කාර්යයේ නිරතව සිටින නමුත් ධාරානිපාත වර්ෂාව සහ ගලා යන ජලය අඛණ්ඩ මෙහෙයුම් වලට විශාල අභියෝගයක් වී තිබේ.
යුද්ධ හමුදාපතිතුමන්ගේ උපදෙස් පරිදි බටහිර ආරක්‍ෂක සේනා මූලස්ථානයේ (SFHQ-බටහිර) 61 වන සේනාංකය යටතේ ඇති 611 බලසේනාවට අයත් 8 ශ්‍රී ලංකා සිංහ රෙජිමේන්තු (SLSR) භට පිරිස් මෙම මෙහෙයුමේ නිරතව සිටී.
