පළාත් පාලන මැතිවරණය සම්බන්ධයෙන් මැතිවරණ කොමිෂන් සභාවේ අභ්‍යන්තර බෙදීමක් ඇතිව තිබෙන බව එම කොමිසමේ ආරංචි මාර්ග පවසයි.
පළාත් පාලන මැතිවරණයේ නාමයෝජනා කැදවීමේ ගැසෙට්ටුව නිකුත් කර, තැපැල් ඡන්ද ප්‍රකාශය සඳහා දින නියමවී තිබියදීත් මෙම මතභේදය පවතින බව සඳහන් ය.
මැතිවරණය පැවැත්විය යුතු බවට කොමිසමේ කොටසක් ප්‍රකාශ කරද්දී තවත් පිරිසක් පවසන්නේ මුදල් නොමැතිකම නිසා මැතිවරණය නොපවැත්විය යුතු බවට ය.
නාමයෝජනා කැදවූවත් මේ හේතුවෙන් මැතිවරණය පැවැත්වීමේ ගැටළු රාශියක් මතුවීමේ අවදානමක් ගැන මැතිවරණ නිරික්ෂණ සංවිධාන පවසයි.
මැතිවරණය පැවැත්වීම වෙනුවෙන් බිලියන 12 ට වැඩි මුදලක් අවශ්‍ය නමුත් මෙවර අයවැයෙන් මුදල් වෙන් කර ඇත්තේ බිලියන 10 කි.
සම්පූර්ණ මුදල නොගෙන මැතිවරණ වියදම් කළමනාකරණය කළ නොහැකි බවට කොමිසමේ බහුතරයකගේ අදහසයි.
ඔවුන් පෙන්වාදෙන්නේ රාජකාරි ගෙවීම්, ඉන්ධන සහ අහාර වෙනුවෙන් මහාභාණ්ඩාගාරයෙන් මුදල් නොලදහොත් රාජකාරි ගැටළු රාශියක් උද්ගතවනු ඇති බවය.
එම නිසා මෙම ගැටළු ගැන මුදල් අමාත්‍යංශය සමඟ සාකච්ඡා කොට මුදල් ලැබෙන බවට සහතිකයක් නොගෙන මැතිවරණ දිනය ප්‍රකාශයට පත් නොකරන ලෙස මැතිවරණ කොමිසමේ බහුතර සමාජිකයන්ගේ ඉල්ලීම වී ඇතැයි ද වාර්තා වේ..
