දම්පත් රණසිංහ/රමේෂ් වරල්ලෙගම
වෙසක් පොහොය දිනයේ ප්‍රසිද්ධ ආගමික විහාරස්ථාන සදහා පැමිණි බෞද්ධ බැතුමතුන්ගේ අඩුවක් ඇතැයි රූපවාහිනි හා ගුවන් විදුලි නාලිකා ප්‍රවෘත්ති ඔස්සේ ප්‍රචාරය කළද ගමේ පන්සලට වෙනදාට වැඩි ජනතාවක් එක්ව ඇති බව ප්‍රදේශිය වාර්තා පෙන්වා දෙයි. වෙනදාට වෙසක් උත්සවය සැමරීම සදහා බොහෝ බෞද්ධ හා අනෙකුත් ආගමික බැතුමතුන්ද ප්‍රසිද්ධ විහාරස්ථානවල පැමිණීම සාමාන්‍ය දෙයක් වු අතර එම වෙහෙර විහාරස්ථාන බෞද්ධ බැතිමතුන්ගෙන් පිරී ඉතිරි යන දර්ශන රූපවාහිනි නාලිකා විකාශය කළේය.
නමුත් මෙවර විශේෂත්වය ලෙස තමන්ට ළගපාත පන්සලට ගොස් ආගමික වතාවත් සිදුකොට නැවත නිවෙස්වලට පැමිණීමට බෞද්ධ බැතිමතුන් බෙහෝ පිරිසක් කටයුතු කළහ.
පාස්කු ඉරිදා ප්‍රහාරයේ කම්පනය හේතුවෙන් මෙවර වෙසක් උත්සව රැසක් අවලංගු කර දැමීමට පියවර ගෙන තිබු අතර තැන තැන දන්සැල සංවිධානය කිරීමද අඩු වී තිබිණි. මේ නිසා මෙවර වෙසක් උත්සවයේ විශේෂත්වයක් වනුයේ ආමිස පුජාවට වඩා ප්‍රතිපත්ති පුජාවට වැඩි නැඹුරුවක් ඇති කළ වෙසක් පොහොය දිනයක් ලෙස බව කළම්බො එකස්ප්‍රස් හා සම්බන්ධ වු බෞද්ධයන් කිහිප දෙනෙක්ම පැවැසුහ. සමාජ මාධ්‍ය ඔස්සේද එවැනි අදහස් ප්‍රචාරය වී තිබු අතර නියම වෙසක් දැක්කෙ මේ පාර යැයි වැනි අදහස්ද ඒ අතර වුයේය.
