ඇවිදීම පුරුද්දක් ලෙස සිදු කිරීමෙන් අත්වන වාසි පිළිබඳව පැහැදිලි කරන බොහෝ අධ්‍යයන පවතී. නමුත් ඇවිදිය යුතු ආකාරය සහ කොපමණ දුරක් ඇවිදිය යුතු ද යන්න පිළිබඳව පවතින නීති සහ ක්‍රම වෙනස් වේ.
පසුගිය මාස කිහිපය පුරා ඇවිදීම සඳහා භාවිත කරන ක්‍රමයක් පිළිබඳ සමාජ මාධ්‍ය ඔස්සේ පුළුල් ලෙස සාකච්ඡාවට ලක්විය. ඒ ආකාරයට ඇවිදීම හෘද සෞඛ්‍යයට සහ මානසික යහපැවැත්මට ප්‍රයෝජනවත් විය හැකි බව ඒවායේ සඳහන් විය.
එය හැඳින්වූයේ 6-6-6 ඇවිදීමේ ක්‍රම චර්යාව ලෙසයි
, මොකක් ද මේ 6-6-6 ඇවිදීමේ ක්‍රමය? එය අපගේ සෞඛ්‍යයට වාසිදායක වන්නේ කොහොම ද? මෙම ඇවිදීමේ ක්‍රමය අප අනුගමනය කළ යුත්තේ කෙසේ ද? වැදගත්ම දෙය නම්, එය අනුගමනය කිරීමේදී අප මතක‍යේ තබා ගත යුතු දෑ මොනවා ද?
පෝෂණවේදිනියක, සුවතා චිකිත්සකවරියක සහ Metamorphosisහි නිර්මාතෘ සහ ප්‍රධාන විධායක නිලධාරී දිව්‍යා ප්‍රකාශ් මහත්මිය මාධ්‍ය වෙත අදහස් දක්වමින් 6-6-6 ලෙස හඳුන්වන මෙම ඇවිදීමේ පුහුණු ක්‍රමය ගැන විග්‍රහ කළාය .
ඔබ වේගයෙන් ඇවිදින විට, ඔබේ හෘද ස්පන්දන වේගය වැඩි වේ. එවිට රුධිර සංසරණය ද ඉහළ යයි .සෑම දිනක ම උදෑසන 6ට හෝ පස්වරු 6ට විනාඩි 60ක කාලයක් ඇවිදීම 6-6-6 ඇවිදීමේ ක්‍රමය ලෙස හඳුන්වයි.
මීට අමතරව, විනාඩි 6ක ශරීරය උණුසුම් කිරීමේ ව්‍යායාමයක් (ව්‍යායාමයක නිරත වීමට පෙර ශරීරය ඒ සඳහා සූදානම් කිරීමට උපකාර වන සරල චලනයන්) සහ මිනිත්තු 6ක ශරීරය සැහැල්ලු කිරීමේ ක්‍රියාකාරකමක් (ව්‍යායාම කිරීමෙන් පසු ශරීරය සැහැල්ලු කිරීම සඳහා සිදු කරන චලන) ද අවශ්‍ය වේ.
දිව්‍යා ප්‍රකාශ් පවසන්නේ, මෙම ක්‍රමය සතියට දින 6 ක් සිදු කළ යුතු බවයි. ඇය පවසන පරිදි 6-6-6 ඇවිදීමේ ක්‍රමය පිළිබඳව විවිධ මත පවතී.
“ඇතැම් පුද්ගලයින් පියවර 6,000ක් ඇවිදීම ගැන කතා කරනවා, සමහරු දින 6ක් මෙම පුරුද්ද අනුගමනය කිරීම ගැන කතා කරනවා. වැදගත් වන්නේ දිනකට විනාඩි 60ක් ඇවිදින එකයි. ඔබ එය උදෑසනදී මිනිත්තු 30ක් සහ සවස් කාලයේදී මිනිත්තු 30 ක් ලෙස බෙදා සිදු කළත්, ඔබ විනාඩි 60ක් ඇවිදීම කළ යුතුමයි,” ඇය පවසයි.
එනම් විශේෂඥයින් පවසන්නේ ඇවිදීම ඔබේ දෛනික චර්යාවේ කොටසක් කර ගැනීම මෙහි අරමුණ බවයි.
Lancet Public Health සඟරාව ඔස්සේ ප්‍රකාශයට පත් කරන ලද නවතම අධ්‍යයනයකින් පෙන්වා දෙන්නේ දිනකට පියවර 7,000ක් ඇවිදීම මගින් පිළිකා, ඩිමෙන්ෂියා සහ හෘදය ආශ්‍රිත බරපතළ රෝග ඇතිවීමේ අවදානම අඩු කරන බව ය.
6-6-6 ක්‍රමයට අනුව ඇවිදීම ශරීරය නිරෝගීව තබා ගැනීමටත් හදවත සහ මනස ශක්තිමත්ව තබා ගැනීමටත් උදව් වන බව දිව්‍යා ප්‍රකාශ් පවසයි.
සතියකට විනාඩි 150ක් ඇවිදීම හදවත නිරෝගීව තබා ගැනීම සඳහා උපකාර වන අතර ආසියානුවන්ට සතියකට අවම වශයෙන් විනාඩි 250ක්වත් ඇවිදීමට උපදෙස් දී ඇති බව දිව්‍යා ප්‍රකාශ් පවසයි.
“අපි සතියකට දින 6ක් විනාඩි 60ක් ඇවිදින විට, එය සතියකට මිනිත්තු 360ක් පමණ වෙනවා. ඒක අපේ හදවත හොඳයි,” යනුවෙන් දිව්‍යා පැහැදිලි කරයි.
කෙසේ වෙතත් ඇය අවධාරණය කරන්නේ හෘද සෞඛ්‍යය මනාව පවත්වා ගැනීමට නම් සෑම දිනකම මිනිත්තු 60ක කාලයක් මේ අයුරින් වේගයෙන් ඇවිදීම සිදු කළ යුතු බවයි.
“මෙම අවස්ථාවේදී ඔබේ හෘද ස්පන්දන වේගය උපරිම හෘද ස්පන්දන වේගයෙන් 60% – 70% අතර විය යුතුයි,” යනුවෙන් වේගයෙන් ඇවිදීමේදී ශරීරය තුළ සිදුවන වෙනස්කම් පැහැදිලි කරමින් ඇය පවසයි. මෙය ‘Zone 2 Heart Rate’ ලෙස හඳුන්වයි.
අපගේ උපරිම හෘද ස්පන්දන වේගය කුමක් විය යුතු ද යන ප්‍රශ්නයට පිළිතුරු දීම සඳහා දිව්‍යා ප්‍රකාශ් ගණනය කිරීමක් ඉදිරිපත් කරයි.
පළමුවෙන් ම ඔබේ වයස අවුරුදු 220න් අඩු කරන්න. දැන් ඔබට වයස අවුරුදු 50ක් බව සිතමු.
අප 220න් 50ක් අඩු කළ විට ලැබෙන පිළිතුර 170කි.
වයස අවුරුදු 50ක පුද්ගලයෙකුගේ උපරිම හෘද ස්පන්දනය එය විය යුතුයි.
අප මේ 170න් සියයට 60 සිට 70 දක්වා ගණනය කරනවා නම් අපට 102 සිට 119 දක්වා අගයක් ලැබෙනු ඇත.
එබැවින්, අවුරුදු 50ක පුද්ගලයෙකු විනාඩියකට ස්පන්දන 102ත් 119ත් අතර හෘද ස්පන්දන වේගයක් ඇති වන ලෙස ඇවිද යා යුතුය. ෆිට්නස් ට්‍රැකර් සහ ස්මාර්ට් අත් ඔරලෝසු භාවිතයෙන් හෘද ස්පන්දන වේගය සොයා ගැනීමේ හැකියාව පවතී.
සාමාන්‍යයෙන්, පුද්ගලයෙකුගේ හෘද ස්පන්දන වේගය විනාඩියකට 60ත් 100ත් අතර අගයක පවතී.
ඔබ වේගයෙන් ඇවිදින විට, ඔබේ හෘද ස්පන්දන වේගය වැඩි වේ. එවිට රුධිර සංසරණය ද ඉහළ යයි. ඇවිදීමේ අරමුණ මෙයයි. එය හදවත නිරෝගීව තබා ගැනීමට උපකාරී වන බව දිව්‍යා ප්‍රකාශ් පවසයි.
6-6-6 ක්‍රමයට ඇවිදීම අපගේ මානසික සෞඛ්‍යයට ද බෙහෙවින් හිතකර බව විශේෂඥයෝ පවසති.
ඒ, ඔබ උදෑසන හෝ සවස් කාලයේදී මද වේලාවක් එළිමහනේ ඇවිදින විට මොළය සැහැල්ලු වන බැවිනි.
“සැලකිය යුතු වේලාවක් ඇවිදින එක භාවනා ක්‍රමයක්. ඔබ තනිව ස්ථාවර වේගයකින් ඇවිදින විට මනස සන්සුන් වෙනවා,” දිව්‍යා ප්‍රකාශ් පවසයි.
ඔබ උදෑසන මෙම ඇවිදීමේ ක්‍රමය අනුගමනය කරන විට, දවස පුරා හොඳින් ක්‍රියා කිරීමට ඔබව සූදානම් කරන බව ඇය පවසයි.
දවසේ ආතතිය අඩු කර ගැනීමට, ඔබේ මනෝභාවය වැඩිදියුණු කර ගැනීමට සහ ඔබේ සමස්ත දවසේ ක්‍රියාකාරකම් සාර්ථක කර ගැනීමට සවස් කාලයේදී ඇවිදීම උදව් වන බව විශේෂඥයින් පවසයි .
දිව්‍යා ප්‍රකාශ් පවසන්නේ සෞඛ්‍ය සම්පන්න ජීවන රටාවක් සඳහා කරුණු දෙකක් වැදගත් වන බවයි.
- සමබර සහ පෝෂ්‍යදායී ආහාර වේලක්
- ශරීර චලනය
ශාරීරිකව ක්‍රියාශීලී වීම මේ දිනවල බොහෝ දෙනෙකුට ඉතා අපහසු වී ඇත. එක් අතකින් අප අතරින් බොහෝ දෙනෙකුට වාඩි වී සිටින ජීවන රටාවක් පවතී.
“වර්තමානයේදී බොහෝ පහසුකම් පවතින නිසා අපිට අපේ ශරීරය පාවිච්චි කරන්න හැකියාවක් නැහැ. අපි පළමු මහලට යාමට පවා සෝපානය පාවිච්චි කරනවා.”
“මීට අමතරව, ඩිජිටල් තිර භාවිත කරමින් මිනිසුන් වැඩි කාලයක් ගත කරන නිසා ඔවුන්ගේ ශාරීරික ක්‍රියාකාරකම් අඩු වෙමින් තිබෙනවා,” දිවය ප්‍රකාශ් පවසයි.
එවැනි තත්වයක් තුළ 6-6-6 රටාව තුළ ඇවිදීමේ පුරුද්ද අනුගමනය කිරීම සෞඛ්‍ය සම්පන්න ජීවන රටාවක් සඳහා ධනාත්මක පියවරක් විය හැකියි.
ඔබේ නියමිත සහ කාර්යබහුල කාලසටහනට අනුව ඔබට එම ව්‍යායාමයේ නිරත විය හැකි බැවින් එය අනුගමනය කිරීම ද පහසු වේ.
“සෑම පුද්ගලයෙකුට ම 6-6-6 ඇවිදීමේ ක්‍රමය අනුගමනය කරන්න පුළුවන්. ඒ සඳහා ඔබට ශරීර සුවතා මධ්‍යස්ථානයකට යාමේ අවශ්‍යතාවක් නැහැ. ඔබට විසිතුරු උපකරණ මිල දී ගැනීමට අවශ්‍ය වෙන්නෙත් නැහැ. ඔබට අවශ්‍ය වන්නේ ඇවිදීම සඳහා සපත්තු පමණයි,”
දිව්‍යා ප්‍රකාශ් පවසන්නේ, මහලු හෝ තරුණ වුව සෑම කෙනෙකුට ම මෙම ක්‍රමය අනුගමනය කළ හැකි බවයි.
“දැනටමත් තරබාරු ශරීරයක් තියෙන පුද්ගලයින්ට දිවීම අපහසු වෙන්න පුළුවන්, නමුත් ඇවිදින එක එයාලට ගැටලුවක් නෙවෙයි,” ඇය සඳහන් කළා ය.
“අපි ඉලක්කයක් තබා ගත්තොත්, පළමු වරට උත්සහ කරන පිරිසට ඒක දුෂ්කර වෙන්න පුළුවන් කියලා මම හිතනවා. උදාහරණයක් විදිහට කෙනෙකුට පැය භාගයක් හෝ පැයක් අඛණ්ඩව ඇවිදින්න බැරි වෙන්න පුළුවන්. ඉතින් ඒ කෙනා විනාඩි 10කින් ආරම්භ කරනවා නම් ඒක හොඳයි,” කයිලාෂ් මෙනන් පවසයි.
ඒ අයුරින් ඔබගේ ඇවිදීමේ පුරුද්ද ඔබට ම තීරණය කළ හැකි බව ඔහු පැවසුවේය.
එනම්, ඔහු පෙන්වා දෙන්නේ 6-6-6 ක්‍රමයේ ඇවිදීමේ ක්‍රමයේ හරය වන්නේ ඔබ උදෑසන සහ සවස් කාලයේදී ඇවිද යා යුතු බවයි.
දිව්‍යා ප්‍රකාශ් පවසන්නේ, 6-6-6 දින චර්යාවට සතියකට දින 6ක්, උදේ 6ට මිනිත්තු 60ක කාලයක් ඇවිදීම ඇතුළත් වන අයුරින් මිනිසුන්ට මතක තබා ගැනීමට පහසු වන පරිදි නිර්මාණය කර ඇති බවයි.
කෙසේ වෙතත්, කිසියම් අයෙකු මීට පෙර කිසි දිනෙක ඇවිදීම සිදු කර නොමැති නම් ඔවුන් පළමු දිනයේ මිනිත්තු 60ක කාලයක් වේගයෙන් ඇවිද යාමට අවශ්‍ය නොවන බව ද ඇය පවසයි.
“ඔබ ඔබේ ශරීරයට සවන් දෙන එකත් කරන්න ඕනේ. 6-6-6 ඇවිදීමේ පුරුද්ද හොඳයි, නමුත් ඔබ ප්‍රායෝගික මාර්ගෝපදේශ අවබෝධ කර ගත යුතුයි,” ඇය අවධාරණය කළා ය.
6-6-6 ඇවිදීමේ ක්‍රමය කියා දෙන කයිලාෂ් මෙනන් පවසන්නේ, ඔබ වේගයෙන් ඇවිදින්නේ නම් ශරීරය උණුසුම් හෝ සැහැල්ලු කිරීමේ කිසිදු ක්‍රියාකාරකම් අවශ්‍ය නොවන අතර ඇවිදීමට පෙර සහ පසු ශරීරය ඇදීමේ (stretch) ව්‍යායාම කළ යුතු බව ය.
විශේෂයෙන් ම විශේෂඥයන් පවසන්නේ, ‘උණුසුම් කිරීම’ සහ ‘සිසිල් කිරීම’ යනු ඔබ හදිසියේ ව්‍යායාම ආරම්භ කිරීම හෝ නැවැත්වීම වැළැක්වීමේ අරමුණින් සිදු කරන්නක් බවයි.
ඇවිදීම ආරම්භ කරන විට, පළමුව සෙමින් ඇවිදීමෙන් ඔබේ ශරීරය උණුසුම් කර අනතුරුව ඔබේ වේගය වැඩි කළ හැකියි. ඔබේ වේගවත් ඇවිදීම අවසන් කිරීමෙන් අනතුරුව ක්‍රමයෙන් මන්දගාමී බවට පැමිණීම සැහැල්ලු වීමට හොඳ ක්‍රමයකි.
විශේෂඥයින් පවසන්නේ සෞඛ්‍ය සම්පන්න ආහාර වේලක් ලබා ගන්නා අතර ම ධනාත්මක ආකාරයකින් මෙම චර්යාව අනුගමනය කරන්නේ නම් එය ඉතා ප්‍රතිඵලදායක වනු ඇති බවයි.
