එක්සත් ලංකා ඉන්ධන ප්‍රවාහන බවුසර් රථ හිමිකරුවන්ගේ සංගමය අනතුරු ඇඟවීමක් කරමින් පවසන්නේ, ඉන්ධන බෙදාහැරීමේ කටයුතු වෙනත් පාර්ශවයකට අත්තනෝමතිකව පැවරීමට රජය සූදානම් වන බවයි.
මෙම තීරණය රටේ ඉන්ධන සැපයුම් ජාලය බරපතළ අර්බුදයකට ඇද දැමිය හැකි බවට සංගමය අවධාරණය කරයි.
සංගමයේ භාණ්ඩාගාරික, ජගත් පරාක්‍රම මහතා පෙන්වා දෙන්නේ, යෝජිත වැඩපිළිවෙළ ක්‍රියාත්මක වුවහොත් ඉන්ධන බෙදාහැරීමේ කටයුතු සම්පූර්ණයෙන්ම කඩාකප්පල් විය හැකි බවයි.
තවදුරටත් අදහස් දක්වමින් ඒ මහතා කියා සිටියේ, ඉන්ධන ප්‍රවාහනයද ඒකාධිකාරියකට යටත් කිරීමට බරපතළ උත්සාහයක් පවතින බවයි.
‘මෙතෙක් කාලයක් තොග ගබඩාවලට බවුසර් රථවලින් තෙල් ඇද්දේ අපේ බවුසර් රථහිමියන් විසින්. මොකද අපි තමා මේ ලංකාවේ ප්‍රධානතම ප්‍රවාහන සේවාව කරන්නේ. අපි තෙල් ඇද්දේ නැත්නම් වෙන කිසිම කෙනෙක්ට දුවන්න තෙල් හම්බවෙන්නේ නෑ.
නමුත් පහුගිය වසර දෙක තුනක කාලයේ සිට මේ ව්‍යාපාරය ගජමිතුරු ව්‍යාපාරිකයින් දෙතුන් දෙනෙකුට පවරලා දෙන්න ලෑස්ති වෙලා තිබුණා. අපි සංගමයක් විදියට මැදිහත් වෙලා කාලයක් පුරා ඒක නවත්තාගෙන තිබුණා. නමුත් මේ අවස්ථාවේ තමන්ගේ ගජමිතුරන් කිහිපදෙනෙකුට මේ ප්‍රවාහන සේවය පවරලා දෙන්න තමා මේ හදන්නේ.
බවුසර් එකක් දෙකක් තියෙන බවුසර් රථහිමියන් තමා, ගොඩක් වෙලාවට මේ ව්‍යාපාරයේ යෙදෙන්නේ. බවුසර් රථහිමියෝ 400 – 500ක් විතර මේ සංගමයේ ඉන්නවා. නමුත් මේ අය නියමු ව්‍යාපෘතියක් විදියට කොළඹ සහ මුතුරාජවෙල ඉඳලා කුරුණෑගල පර්යන්තය දක්වා තෙල් ප්‍රවාහනය කිරීම ටෙන්ඩර් මඟින් එක් මුදලාලි කෙනෙකුට භාරදෙන්න හදනවා.
මෙහෙම ගියොත් අන්තිමට වෙන්නේ අනෙක් ප්‍රවාහන සේවාවන්ට සිදුවුණ දේ තමා. ඒ නිසා මේක වහාම නවත්තලා සාමාන්‍ය පරිදි ප්‍රවාහන සේවා ඒකාධිකාරියකට යටත් කරන්නේ නැතුව පොදු ජනතාවගේ සේවාවක් ලෙස කරන් යන්න අවස්ථාව දෙන්න.”
