ප්‍රභාකරන්ගේ මියගිය දියණිය ද්වාරකා ජීවත්ව සිටින බවට ව්‍යාජ ලෙස සකස්කරන ලද ප්‍රකාශයක් මහවිරු දිනයට සමගාමීව සමාජ ජාලා වෙත ඊයේ නිකුත්කර තිබේ. ‘ඩීප් ෆේක්‘ තාක්ෂණය ඔස්සේ වෙනත් කාන්තාවකගේ වීඩියෝවක මුහුණ වෙනසකට ලක්කිරීමෙන් මෙම ප්‍රකාශය එළිදක්වා ඇති බවත් හඳුනාගන්නට ලැබේ.
දෙමළ ඊළාම් විමුක්ති කොටි සංවිධානයේ (එල්ටීටීඊ) හිටපු ප්‍රධානී ප්‍රභාකරන්ගේ දියණිය බව පවසමින් කාන්තාවකගේ වීඩියෝවක් සමාජ මාධ්‍ය ජාලා වෙත යොමු කරන්නට යන බව බුද්ධි අංශ තොරතුරු පසුගිය දිනවල තොරතුරු සපයා තිබූ අතර නිකුත් කර ඇති වීඩියෝවේ ද්වාරකා ප්‍රභාකරන් ලෙසින් තමන්ව හඳුනා ගන්නා එම කාන්තාව වැදගත් දිනයක තම අනන්‍යතාව ලොවට හෙළි කිරීමට කැමැත්ත පළ කරන්නීය. “මම මෙතන ඉන්නේ අනේකවිධ දුෂ්කරතා සහ පාවාදීම් ජයගෙන. දවසක මම ඊළම ලබාගෙන මගේ ජනතාවට සේවය කරන්න බලාපොරොත්තු වෙනවා” යනුවෙන් ඇය කියයි.
මුල්ලිවයික්කාල් යුද්ධයේ අවසන් දිනවලදී ප්‍රභාකරන් සහ ඔහුගේ පවුලේ අය මිය ගිය බව ශ්‍රී ලංකා හමුදාව ප්‍රකාශ කිරීමෙන් වසර 14 කට පමණ පසු මෙම වීඩියෝව සමාජ මාධ්‍ය වේදිකාවල බෙදාගැනීම විශේෂිතය. ඇය ජීවත්ව සිටියානම් මෙතරම් කල් ආරංචියක් නොතිබුනේ කෙසේද යන්න ගැටලුවකි.
දෙමළ භාෂාවෙන් විනාඩි 12ක දීර්ඝ කතාවේදී කාන්තාව කියා සිටින්නේ එල්ටීටීඊයට සෘජුව මුහුණ දීමට නොහැකි වූ විට ශ්‍රී ලංකා රජය බලවත් ජාතීන්ගෙන් සහය පැතූ බවයි. දේශපාලන අවශ්‍යතා සඳහා විවිධත්වය තුළ එකමුතු බව අවධාරණය කරමින් එල්.ටී.ටී.ඊ සංවිධානයේ නිදහස සඳහා වූ සටන අඛණ්ඩව ඉදිරියට ගෙන යන බව සාරි හැඳගත් කාන්තාව අවධාරණය කළාය.
විදේශගත ශ්‍රී ලාංකිකයන් අමතමින් ඇය ශ්‍රී ලංකාවේ ආන්තික දෙමළ ජනතාව ගැන සැලකිලිමත් වන ලෙස ඉල්ලා සිටියාය. වෙනම දෙමළ ඊළමක් ස්වයං පාලනයක් සහ සංවර්ධනයක් ලබා දෙනු ඇති බවට විශ්වාසය පළ කරමින් එම කාන්තාව ප්‍රකාශ කළේ එය ජාතික නායකයාගේ අදහස තමන් ක්‍රියාත්මක කරන බවයි.
තවද, දෙමළ අරගලය සිංහල ජනතාවට එරෙහිව නොවන බවත්, ඔවුන්ට එරෙහිව අහිංසකයන් හසුරුවන රජයට සහ දූෂිත දේශපාලනඥයන්ට එරෙහිව බවත් එම කාන්තාව පැහැදිලි කළාය
කෘත්‍රිම බුද්ධිය (AI) යොදාගෙන ද්වාරකා ප්‍රභාකරන් යැයි පවසමින් නිකුත් කර ඇති වීඩියෝ පටය ගැන ඉදිරියේදී විමර්ශන සිදුවනු ඇතැයි අපේක්ෂා කෙරේ.
පහත පළවන්නේ එම වීඩියෝව ව්‍යාජ ලෙස සැකසීම ගැන පැහැදිලි කරන දමිළ වීඩියෝවකි.
