ශ්‍රී ලංකා රුපියලට එරෙහිව එක්සත් ජනපද ඩොලරයේ කැපීපෙනෙන පහළ යාමක් අද (15) දිනයේ දී වාර්තා වී තිබේ.
ඒ අනුව ශ්‍රී ලංකා මහ බැංකුවේ නිල දෛනික විනිමය අනුපාතික සටහනට අනුව අද දිනයේ දී ඩොලරයේ ගැනුම් මිල රු. 297.19 ක් ලෙසත් විකුණුම් මිල රු. 306.40 ක් ලෙසත් සටහන් වී ඇත.
අද දිනයේ දී ඩොලරයේ මධ්‍ය අගය සටහන් වී ඇත්තේ රු. 302.19 ක් ලෙසිනි. පසුගිය සිකුරාදා (12) මෙම අගය රු. 303.32 ක් ලෙසින් වාර්තා විය.
මේ අතර ශ්‍රී ලංකා මහ බැංකුව පවසන්නේ පසුගිය 2024 ජූනි මාසය තුළ දී මිලියන 57ක ඩොලර් ප්‍රමාණයක් දේශීය විදේශ විනිමය වෙළෙඳපොළේ අලෙවි කර ඇති බවයි. එසේම කිසිදු ඩොලර් මිල දී ගැනීමක් පසුගිය ජූනි මාසයේ දී මහ බැංකුව විසින් සිදුනොකර තිබීම ද විශේෂත්වයකි. මෙලෙස මහ බැංකුව 2024 වසරේ දී මේ දක්වා දේශීය විදේශ විනිමය වෙළෙඳපොළෙන් කිසිදු විනිමය මිල දී ගැනීමක් සිදුනොකළ මාසය බවට ද, 2024 ජූනි මාසය හැඳින්විය හැකිය.
මහ බැංකුව වැඩිදුරටත් පවසන්නේ 2024 වසරේ ජූලි 12 වැනි දින දක්වා කාලපරිච්ඡේදය තුළ දී එක්සත් ජනපද ඩොලරයට එරෙහිව ශ්‍රී ලංකා රුපියල සියයට 6.8 කින් අතිප්‍රමාණය වී ඇති බවයි.
කෙසේවෙතත් මැයි සහ ජූනි මාසවල දී රුපියල පිළිවෙලින් සියයට 1.7 කින් සහ සියයට 1.2කින් අවප්‍රමාණය වී ඇති බව මහ බැංකුව වැඩිදුරටත් සඳහන් කරයි.
