දම්පත් රණසිංහ
රත්නපුර ප්‍රදේශයේ නව කොරෝනා ආසාදනයෙන් මියගිය මැණික් ව්‍යාපාරිකයාගේ පවුලේ සැමදෙනාටම එම වෛරසය ආසාදනය වීමත් සමඟ අද පෙරවරුවේ ප්‍රදේශ තුනක පවුල් 73ක් දියතලාව නිරෝධායන මධ්‍යස්ථානය වෙත යවා තිබේ.
රත්නපුර, පැල්මඩුල්ල සහ නිවිතිගල ප්‍රදේශවල පවුල් මෙලෙස යවා ඇති අතර ඔවුන් මෙතෙක් ස්වයං නිරෝධායනය යෙදී තිබුණි.
නිවිතිගල ප්‍රදේශයේ එක් පවුලක් සහ රත්නපුර පැල්මඩුල්ල ප්‍රදේශයේ පවුල් හැත්තෑ දෙකක් මෙලෙස දියතලාව නිරෝධායන මධ්‍යස්ථානය වෙත යවා ඇත.
මැණික් ව්‍යාපාරිකයාගේ මිය යාම හා ඔහුගේ පවුලේ සෙසු අයට කොරනා ආසාදනය වී ඇති බවට තහවුරු වීමත් සමඟ ස්වයං නිරෝධායනය වෙමින් සිටි මෙම පවුල් දියතලාව වෙත යැවීමට කටයුතු කළ යුතු බවට සෞඛ්‍ය හා ආරක්ෂක අංශය තීරණය කර තිබේ.
මතු වූ තත්ත්වය හේතුවෙන් රත්නපුර හා පැල්මඩුල්ල ප්‍රදේශවල අද පෙරවරුවේ ලිහිල්වීමට නියමිතව තිබූ ඇඳිරිනීතිය යළි දැනුම් දෙන තෙක් ක්‍රියාත්මක ය.
