රටේ ළමා නිවාස 400 ක සිටින ළමුන් 11,500 කගේ පමණ ආරක්ෂාව අවදානමට ලක්ව ඇති බව පරිවාස හා ළමා ආරක්ෂණ සේවා දෙපාර්තමේන්තුව පෙන්වාදේ.
රටේ වර්තමාන තත්ත්වය සැලකිල්ලට ගනිමින් ළමා නිවාසවල පදිංචිව සිටින ළමුන් සඳහා විවිධ ආයතන සහ පරිත්‍යාගශීලීන් විවිධ ආකාරයේ ආධාර ලබා දීම අගය කළ යුතු නමුත් මෙසේ විශාල වශයෙන් පිටස්තර පුද්ගලයින් මෙම දරුවන්ගේ නිවෙස්වලට ඇතුළු වුවහොත් එය දරුවන්ට අවදානමක් විය හැකි බව පරිවාස හා ළමා ආරක්ෂණ සේවා දෙපාර්තමේන්තුව සඳහන් කර සිටී.
විශේෂයෙන්ම උසාවි නියෝග මත ළමා නිවෙස්වලට ඇතුළත් කර ඇති දරුවන්ගේ ආරක්ෂාව පිළිබඳව අවධානායක යොමුකළ යුතු බව දෙපාර්තමේන්තුව සඳහන් කර සිටී.
ඇතැම් පුද්ගලයින් සහ මාධ්‍ය ආයතන දරුවන්ට ආහාර සහ වෙනත් ද්‍රව්‍ය ලබා දී, ඔවුන්ගේ ප්‍රකාශ සහ ඡායාරූප ලබා ගැනීමට උත්සාහ ගන්නා බවත් මෙය දරුවන්ගේ ආරක්ෂාවට බලපාන අතර ඔවුන්ගේ මානසික තත්ත්වය සහ ආත්ම අභිමානයටද හානියක් බව ”පරිවාස හා ළමා ආරක්ෂණ සේවා දෙපාර්තමේන්තුව සඳහන් කර සිටී.
ඒ අනුව මෙම ළමුන්ට සෘජුවම ආහාර භාර නොදෙන ලෙසත්, ඔවුන්ගේ යෝජනා, අදහස් හෝ ඡායාරූප ලබා ගැනීමෙන් වළකින ලෙසත්, ආධාරයක් ලබා දීමට පෙර ළමා නිවාසය පිහිටා ඇති ප්‍රදේශයේ පරිවාස හා ළමා ආරක්ෂණ සේවා පළාත් කොමසාරිස්වරයාට දන්වන ලෙසත් දෙපාර්තමේන්තුව ඉල්ලා සිටී.
