ජනාධිපතිවරයාට සහ ආණ්ඩුවට ඉල්ලා අස්වන ලෙස බල කරමින් වෘත්තිය සමිති දහසකට ආසන්න ප්‍රමාණයක් ක්‍රියාත්මක කළ වැඩවර්ජන හේතුවෙන් අද බොහෝ රාජ්‍ය හා පෞද්ගලික ආයතනවල වැඩකටයුතු අඩාල වුණා. වැඩවර්ජනයේ නිරතවූ වෘත්තිය සමිති දිවයිනේ ප්‍රධාන නගර රාශියකදී විරෝධතා පෙලපාළි සහ උද්ඝෝෂණ පැවැත්වූ බව වාර්තාවේ .
එම විරෝධතාවයට එක්වූ වෘත්තිය සමිති හා බහුජන සංවිධාන එකමුතුවේ සම කැඳවුම්කරු රවී කුමුදේෂ් පැවසුවේ ආණ්ඩුව ජනතා හඬට ඇහුම්කන් නොදෙන්නේ නම් තවත් දින 07 කින් අඛණ්ඩ වෘත්තිය ක්‍රියාමාර්ගයකට එළඹෙන බවයි.
පිටකොටුව සහ දිවයිනේ වෙනත් ප්‍රදේශවල ව්‍යාපාරික ස්ථාන රැසක් වසා දමා තිබුණා. බස් රථ සහ දුම්රිය සේවකයින් වර්ජනයට සහය පළ කිරීම හේතුවෙන් අද දිනයේ පුද්ගලික බස් සහ දුම්රිය ධාවනය ද සැලකිය යුතු ලෙස අඩු මට්ටමක පැවති බවද වාර්තාවිය ,.
