ශ්‍රී ලංකාවේ සිංහල මහා ජාතියෙන් එල්ලවන බලපෑම් වලට මුහුණදීම සඳහා ශ්‍රී ලංකාවේ දෙමල හා මුස්ලිම් ජන සමාජයන් එක්ව නැගී සිටිය යුතු බව ද්‍රවිඩ ජාතික සන්ධානයේ පාර්ලිමේන්තු මන්ත්‍රී එම් ඒ සුමන්තිරන් මහතා අවධාරණය කර සිටී.
මෙරට ජාතික ගැටලුවට විසදුම් ලබාගැනීම සඳහාද ද්‍රවිඩ හා මුස්ලිම් ජාතීන් එකමුතුව රජය වෙත බලපෑම් කල යුතු බවද ඉන්දියාවේ හින්දු පුවත්පතට සම්මුඛ සාකච්ජාවක් ලබාදෙමින් සුමන්තිරන් මහතා අවධාරණය කර ඇත.
වත්මන් රජය මෙරට ද්‍රවිඩ ජනතාවට පොරොන්දු ගණනාවක් ලබාදී බලයට පත්වුවද , එම පොරොන්දු නිසි ලෙස ඉටුකිරීමට අසමත්ව ඇති බවත් , එමනිසාම ද්‍රවිඩ ජනතාව වත්මන් රජය පිලිබඳ කලකිරීමකින් පසුවන බවත් සුමන්තිරන් මහතා මෙහිදී අවධාරණය කර ඇත.
දකුණේ දේශපාලන බලවේගයන් සමග කටයුතු කිරීමේදී කැපී පෙනෙන වෙනස්කම් සිදුකිරීමට ද්‍රවිඩ ජාතික සන්ධානය අපේක්ෂා කරන බවත් , විශේෂයෙන්ම ඉදිරියේදී ජනතා විමුක්ති පෙරමුණ සමග වඩාත් සමීපව කටයුතු කිරීම කෙරෙහි තම පක්ෂයේ අවධානය යොමුව ඇති බවත් සුමන්තිරන් මහතා මෙහිදී සඳහන් කර ඇත.
අනාගතයේදී ජනතා විමුක්ති පෙරමුණ සමග එක්ව දේශපාලන වැඩපිළිවෙලක් ක්‍රියාත්මක කිරීම පිළිබඳවද තම පක්ෂයේ අවධානය යොමුව ඇති බව සුමන්තිරන් මහතා හින්දු පුවත්පතට සඳහන් කර ඇත.
