ගයාන් කුමාර වීරසිංහ
ස්විට්සර්ලන්තය සැලකෙන්නේ ලෝකයේ උපරිම ප්‍රජාතන්ත්‍රවාදයක් මෙන්ම මානව හිමිකම් රජයන රටක් ලෙසිනි. එහෙත් මේ රට අපේ රටේ ප්‍රජාතන්ත්‍රවාදය පමණක් නොව, මානව හිමිකම්ද දැඩිව මේ වන විට උල්ලංඝනය කර හමාරය. ඒ ඔවුන්ගේ මෙරට තානාපති කාර්යාලයේ සේවයේ නිරතව සිටින නිලධාරිනියක සුදු වෑන් රථයකින් පැහැරගෙන ගොස් ලිංගික අඩත්තේට්ටම් කරමින් හිරිහැර කළ බවට ව්‍යාජ චෝදනාවක් ඉදිරිපත් කරමිනි. එම චෝදනාව ව්‍යාජ එකක් බව පොලිස් විමර්ශනවලින් පැහැදිලිවම සාක්ෂි සහිතව හෙළි වනවිට අපට වරදක් වූයේ යැයි කියනවා වෙනුවට ඔවුන් තවදුරටත් උත්සහ දරන්නේ සුදු වෑන් රථයකින් සිය තානාපති කාර්යාලයේ සේවිකාවක පැහැරගත්තේ යැයි ලෝකය හමුවේ සනාථ කරන්නටය.
ඒ වෙනුවෙන් මේ වන විටත් තානාපති කාර්යාලය නොගත් උත්සහයක් නැති තරම්ය. පැහැරගැනීමට ලක් වුණු නිලධාරිනියගෙන් පොලීසියට කටඋත්තරයක්වත් ගැනීමට ඉඩක් දෙන්නේද නැත. ඒ අය දැන් උත්සහ දරන්නේ ඇය හොර රහසේ රටින් පන්නා ස්විට්සර්ලන්තයට රැගෙන යන්නටය. ඒ වෙනුවෙන් ඒ අය විශේෂිත ගුවන් යානාවක් පවා සූදානම් කළහ. ඒ අසාධ්‍ය රෝගීන් රැගෙන යන ගුවන් ගිලන් රථයකි. ඒ සැලසුම බිඳ වැටෙන්නේ කල්තියාම ඒ ගැන අපේ රජයේ බුද්ධි අංශවලට තොරතුරු ලැබීම නිසාය. එසේ නොවන්නට එම නිලධාරිනිය පවුල් පිටින්ම මේ වන විට සිටින්නේ ස්විට්සර්ලන්තයේය.
අපේ රටේ නීතියටත් පරමාධිපත්‍යයටත් නිගා කරන ලද එම පැහැර ගැනීමේ නාටකය තිරගත වන්නේ දේශපාලන පෙරළියත් සමඟ අපරාධ පරීක්ෂණ දෙපාර්තමේන්තුවේ සමූහ මංකොල්ලකෑම් විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක නිශාන්ත සිල්වා සිය අඹු දරුවන් සමඟ ස්විට්සර්ලන්තයට පලායමිනි.
දැනට හෙළි වෙමින් ඇති අකාරයට අනුව ඔහුට ඒ සඳහා පහසුකම් සපයා ඇත්තේ සුදු වෑන් රථයකින් පැහැරගැනීමකට ලක් වී ලිංගික අඩත්තේට්ටම්වලට ලක් වුණු බව කියන ස්විස් තානාපති කාර්යාලයේ සේවිකාවය. සියල්ල සිදු වන්නේ පිටපතකට අනුවය. එම පිටපත ලියුවේ කවුරුන් වූවත් එහි දෝෂ ගොන්නකි. ස්විස් තානාපති නිලධාරිනියගේ සුදුවෑන් කථාව අතේ පත්තු වූ බේගලයක් ද යන්න සැක මතු වන්නේ එබැවිනි.
එම නිලධාරිනිය ස්විට්සර්ලන්ත ජාතිකයෙකු හෝ වෙනත් විදේශිය ජාතිකයෙකු නොවන බව පැහැදිලිවම හෙළි වී හමාරය. ඇය කොළඹ උපන් කොළඹ හැදී වැඩුණු ශ්‍රී ලාංකික කාන්තාවකි. ඇය ස්විට්සර්ලන්ත තානාපති කාර්යාලයේ සේවයට මෙරටින් බදවාගත් තැනැත්තියකි.
ඇය පැහැරගත්තේ යැයි කියන්නේ අපරාධ පරීක්ෂණ දෙපාර්තමේන්තුවේ නිශාන්ත සිල්වා මෙරටින් පලාගොස් පැය විසි හතරකට පසුවය. ඒ නොවැම්බර් 25 වැනිදා සවස් කාලයේදීය.
ඇගේ පැහැරගැනීම ගැන අපේ රටේ බලධාරීන් දැනගන්නේ තානාපති කාර්යාලය උපුටා දක්වමින් වෙබ් අඩවිවල සහ ජාත්‍යන්තර මාධ්‍යවල ඒ ගැන වාර්තා පළ කර තිබීමෙනි. ඒ වන තුරුත් ඇගේ පැහැරගැනීම ගැන කිසිදු පැමිණිල්ලක් මෙරට පොලීසියක නොවීය. අඩුම තරමින් ස්විට්සර්ලන්ත තානාපති කර්යාලයෙන් මෙරට බලධාරියෙකුටවත් ඒ ගැන දැනුම්දීමක් කර තිබුණේ නැත. මාධ්‍ය වාර්තා පදනම් කරගනිමින් එම පැහැරගැනීම ගැන තානාපති කාර්යාලයෙන් විමසන්නේ අපේ රටේ බලධාරීහුය.
එහෙත් තානාපති කාර්යාලයෙන් ඊට මුල් අවස්ථාවේදී නිසි පිළිතුරක් නොවීය. ඒ ගැන යමක් ඔවුන් සඳහන් කරන්නේ නම් ඒ දිගින් දිගටම මෙරට බලධාරීන් කළ පෙරැත්ත මතය. එහෙත් ඔවුන් වින්දිත තැනැත්තියගේ අනන්‍යතාව සැඟවූයේ ඇයවත් ඇගේ සැමියා සහ දරු දෙදෙනාවත් තානාපති කාර්යාලයේ රඳවාගෙනය.
එම පැහැරගැනීමේ කතාව ජාත්‍යන්තරය තුළ අපේ රටට එල්ල වන කළු පැල්ලමක් බවට පත් වෙමින් තිබියදී බලධාරීන් වැඩබලන පොලිස්පති සී.ඩී. වික්‍රමරත්න මහතාට දැනුම් දෙන්නේ වහාම ඒ පැහැරගැනීම ගැන පුළුල් විමර්ශනයක් පවත්වන ලෙසටය. ඒ අනුව පරීක්ෂණ කටයුතු භාරවන්නේ අපරාධ පරීක්ෂණ දෙපාර්තමේන්තුවටය.
එහි ප්‍රධානී ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න සහ අධ්‍යක්ෂ ජ්‍යෙෂ්ඨ පොලිස් අධිකාරී ඩබ්ලිව්. තිලකරත්න යන මහත්වරුන් ඒ වගකීම පවරන්නේ සහකාර පොලිස් අධීකාරී ලොකුහෙට්ටි මහතා යටතේ ඇති මිනීමැරුම් විමර්ශන අංශයේ ස්ථානාධිපති ප්‍රධාන පොලිස් පරීක්ෂක රංජිත් මුණසිංහ මහතාටය.
ඔහු ඇතුළු නිලධාරීන්ට ස්විස් තානාපති කාර්යාල සේවිකාව පැහැර ගැනීම ගැන විමර්ශන පවත්වන්නට සිදු වන්නේ අඳුරේ අතපත ගෑමක් ලෙසිනි. ඒ ඇය කවුරුන්ද? ඇයව පැහැර ගත්තේ කොතැනකදීද? යන්න වගක්වත් නොදැනය. තානාපති කාර්යාලය විසින් අපරාධ පරීක්ෂණ දෙපාර්තමේන්තුවට සනාත කරනු ලබන්නේ පැහැර ගැනීමක් සිදුවූ බව පමණි. ඊට එහා විමර්ශන කටයුතු සදහා කිසිදු සහායක් තානාපති කාර්යාලයෙන් නොවීය.
අපේ රටේ විදේශ කටයුතු අමාත්‍යාංශය රාජ්‍ය තාන්ත්‍රික මැදිහත් වීමක් ස්විස් රජය සමඟ සිදු කරන්නේ මෙවන් වාතාවරණයක් හමුවේය. මෙරට ස්විස් තානාපතිවරයාගේ අස්සනින් එම පැහැර ගැනීම ගැන තානාපති කාර්යාලයේ ජ්‍යෙෂ්ඨ නිලධාරියෙකු වන රාහුල් අන්බාජ් මහතා විසින් ලිඛිත පැමිණිල්ලක් පසුගිය 27 වැනිදා ඉදිරිපත් කරන්නේ ඒ අනුවය.
එහෙත් එහි කිසිදු තැනක පැහැර ගැනීමට ලක් වුණු නිලධාරිනියගේ අනන්‍යතාව හෙළි කර තිබුණේ නැත. සදහන් වූයේ 25 වැනිදා සේවය නිමකොට සවස 4-15 ට පමණ ඇය කුලී රථයකින් සිය දරුදෙදෙනා අධ්‍යාපනය ලබන විද්‍යාලයේ මවුපිය රැස්වීමකට සහභාගි වීමට ගොස් නිවසට යමින් සිටියදී පාසල ආසන්නයේදී පැහැරගැනීම සිදු වී ඇති බවය. එම ලිඛිත පැමිණිල්ලේ ස්ථානය දැක්වෙන ගූගල් සිතියමක්ද අමුණා තිබිණි. ඇය පැහැරගන්නේ සුදුපැහැති වෑන් රථයකින් පැමිණි පස් දෙනෙකු බවත් ඒ අය සී.අයි.ඩී. නිලධාරීන් ලෙස සිය අනන්‍යතාව සදහන් කර ඇති බවත්, ලිංගික අඩත්තේට්ටම් කරමින් නිශාන්ත සිල්වා නැමැති අයෙකුට වීසා ලබාදීම ගැන ප්‍රශ්න කර පැය කිහිපයකට පසු මුදා හැර ඇති බවත් එම පැමිණිල්ලේ සඳහන් විය.
තානාපතිවරයාගේ එම පැමිණිල්ලේ කරුණු එම පැහැරගැනීම ගැන මූලික විමර්ශනයක් ආරම්භ කිරීමට ප්‍රමාණවත් වූවත් විමර්ශන ඇරැඹීමට වින්දිත කාන්තාවගේ ප්‍රකාශයක් සවිස්තරව ලබාගැනීම මෙන්ම ඇය කවුරුන්දැයි පැහැදිලිවම හදුනාගැනීමට අපරාධ පරීක්ෂණ දෙපාර්තමේන්තුවේ නිලධාරීන්ට අවශ්‍ය විය.
ඒ වෙනුවෙන් ඉල්ලීම් කිහිපයක්ම කරමින් තානාපතිවරයා අවස්ථා කිහිපයකදීම හමුවූවත් ඇය මුණගැස්සවීම කෙසේ වෙතත් ඇගේ අනන්‍යතාවවත් හෙළිකරන්නට තානාපති කාර්යාලය සූදානම් වූයේ නැත.
ඇගේ අනන්‍යතාව විමර්ශනයක් ඔස්සේ හෙළි කරගැනීමට අපරාධ පරීක්ෂණ දෙපාර්තමේන්තුව තීරණය කරන්නේ ඒ අනුවය. ඒ සඳහා ඔවුන්ට මඟ පෑදෙන්නේ පැහැරගැනීමට ලක්වූ තානාපති කාර්යාල සේවිකාවගේ දරුවන් අධ්‍යාපනය ලබන පාසලේ නම තානාපතිවරයාගේ පැමිණිල්ලේ සඳහන් වී තිබීමය. එම පැමිණිල්ලේ ඇත්තේ ළමයින් දෙදෙනාගේ පාසලේ මවුපිය රැස්වීමක් සඳහා ඇය ගිය බවකි.
ඒ අනුව පැහැදිලි වන්නේ පැහැර ගැනීමට ලක් වුණු දරුවන් දෙදෙනා එම විද්‍යාලයේ අධ්‍යාපනය ලබන බවකි. ඒ ඔස්සේ අපරාධ පරීක්ෂණ දෙපාර්තමේන්තුවේ විමර්ශකයන් තීරණය කරන්නේ එම පාසලේ අධ්‍යාපනය ලබන දරුවන්ගෙන් ස්විස් තානාපති කාර්යාලයේ සේවයේ නිරතව සිටින මවුපියන් සිටින දරුවන් සොයාගැනීමය.
එය එතරම් ලෙහෙසි පහසු කටයුත්තක් නොවූවත් අපරාධ පරීක්ෂණ දෙපාර්තමේන්තුවේ නිලධාරීන්ට පාසල් පරිපාලනයෙන් ලැබෙන්නේ විශාල සහයකි.
පැහැරගත්තේ යැයි කියන තානාපති කාර්යාල සේවිකාවගේ අනන්‍යතාව හෙළි වන්නේ ඒත් එක්කමය.
ඇය ගානියා බැෆ්ස්ටර් ෆැන්සිස්ය. පදිංචි වී සිටියේ මරදාන මාලිගාකන්දේ පිහිටි තට්ටු නිවාස සංකීර්ණයකය. සැමියා බැංකු නිලධාරියෙකි. අපරාධ පරීක්ෂණ දෙපාර්තමේන්තුවේ නිලධාරීන් ඒ නිවසට යන්නේ ඔවුන් ගැන වැඩි යමක් සොයාගන්නටය. ඒ වන විටත් තිබෙන්නේ නිවස වසාදමාය. නිවාස සංකීර්ණයේ මුරකරු අපරාධ පරීක්ෂණ දෙපාර්තමේන්තුවේ නිලධාරීන්ට පවසන්නේ “ නෝනලා රට ගියා“ යැයි කියාය.
ඇගේ මවුපියන් පදිංචි වී සිටින්නේ ද ඒ කිට්ටුව පාතක පිහිටි තට්ටු නිවාස සංකීර්ණයකය. එම නිවසද සොයාගෙන අපරාධ පරීක්ෂණ දෙපාර්තමේන්තුවේ නිලධාරීහු ගියහ. “දුවලා ඇදුම් අරගෙන රට ගියා“ මුරකරු කී ප්‍රකාශය ඇය සනාථ කළාය.
ඒ ප්‍රකාශ දෙකෙන්ම පැහැදිලි වන්නේ තානාපති සේවිකාව සිය පවුල පිටින්ම රට යෑමේ සැලසුමක් ක්‍රියාත්මක වී ඇති බවය. මේ අතර බුද්ධි අංශ යම් තහවුරු කිරීමක් කරන්නේ ස්විස් පැනගත් අපරාධ පරීක්ෂණ දෙපාර්තමේන්තුවේ නිශාන්ත සිල්වා සහ පැහැර ගැනීමට ලක් වූ බව කියන ස්විස් තානාපති කාර්යාල සේවිකාව පවුලේ හිතවතුන් බවය.
ඒ අනුව පැහැදිලි වන්නේ නිශාන්ත සිල්වා දේශපාලන රැකවරණය ලබමින් ස්විට්සර්ලන්තයට පලායෑම සහ තානාපති කාර්යාලයේ නිලධාරිනිය පැහැරගැනීමේ කතාව අතර යම් සම්බන්ධයක් ඇති බවකි. ඒ රට අපකීර්තියට පත් කිරීමේ සහ ස්විට්සර්ලන්තයට ඇයත් පැනයෑම පැහැරගැනීමේ කතාවේ අරමුණ විය හැකි බවද විමර්ශකයන්ට පෙනී ගියේය.
මේ අතර ඇය පදිංචිව සිටි තවත් නිවසක් ගැන තොරතුරු හෙළි විණි. එම නිවස පිහිටා ඇත්තේ ජා – ඇළය. අපරාධ පරීක්ෂණ දෙපාර්තමේන්තුවේ නිලධාරීහු එම නිවසටද ගියහ. එහෙත් ඒ වන විටත් තිබෙන්නේ එම නිවසද වසා දමාය.
අනතුරුව අපරාධ පරීක්ෂණ දෙපාර්තමේන්තුව යන්නේ ඇගේ සැමියා ගැන සොයා ඔහු සේවයේ නිරතව සිටි බැංකුව වෙතය. ඇය පැහැරගැනීමට ලක් වූයේ යැයි කී දින සිට ඔහුද සේවයට පැමිණ නැති බව හෙළි වන්නේ එවිටය.
සියල්ල සිදු වී ඇත්තේ සැලසුම් සහගතව බව ඒ අනුව අපරාධ පරීක්ෂණ දෙපාර්තමේන්තුවට පෙනී ගියේය. පැහැරගැනීම මවා පෑමක් බව පැහැදිලිවම සනාථ වන්නේ තානාපතිවරයාගේ ලිඛිත පැමිණිල්ලේ ඇති ආකාරයට ඇය මවුපිය රැස්වීමකට සහභාගි වීමට පාසලට ගියේ යැයි සඳහන් වූවත් එවන් මවුපිය රැස්වීමක් එදා පාසලේ තිබී නැති බව පාසල් පරිපාලනය විසින් තහවුරු කිරීමෙනි.
තානාපතිවරයාගේ ලිඛිත පැමිණිල්ලට අනුව ඇය පැහැරගෙන ඇත්තේ තානාපති කාර්යාලයෙන් සවස 4.15ට පිට වී පාසලේ මවුපිය රැස්වීමට සහභාගි වී පිටත්ව යමින් සිටියදීය.
තානාපති කාර්යාලය විසින් සදහන් කළා තොරතුරුවලට අනුව ඇයව පැහැර ගැනීමට ලක්ව ඇත්තේ සවස 4.30 ත් සවස 6.00 ත් අතර වේලාව තුළදීය.
අපරාධ පරීක්ෂණ දෙපාර්තමේන්තුවේ නිලධාරීන් පාසල ඇතුළත් ඉන් පිටතත් ඇති සියලු ආරක්ෂක කැමරා ඒ කාලසීමාවට අදාළව නොව, ඊටත් එහා ගිය කාලයක් පරීක්ෂාවට ලක් කළද ඇය තබා ඇගේ සෙවණැල්ලක්වත් එදා පාසල පැත්ත පළාතක පැමිණ ඇති බව අනාවරණය වන්නේ නැත.
අපරාධ පරීක්ෂණ දෙපාර්තමේන්තුවේ විමර්ශන ඒ යැයි කියා හමාර වන්නේ නැත. ඇගේත් සැමියාගේත් ජංගම දුරකතන අංක පවා සොයා ගෙන විමර්ශනයකට ලක් කරන්නේ දෙදෙනා අතර ඒ කියන මොහොතේ සිදු වී ඇති දුරකතන සංවාදවල හැසිරීම ගැන සොයා බලන්නටය.
එහිදී ද පැහැදිලි වන්නේ පැහැරගැනීමකට ලක් වූ බව කියන මොහොතේ ඇය දරුවන්ගේ පාසල පැත්ත පළාතේ සිට නැති බවය. දුරකතන විශ්ලේෂණයේදී පෙනී යන්නේ ඇය වෙනත් ස්ථානයක රැදී සිට ඇති බවකි. ඒ බව තහවුරු වන්නේ ඇගේ ජංගම දුරකතනයෙන් එදා ඇය තානාපති කාර්යාලයෙන් පිටව යන කුළි රථයේ තොරතුරු සොයා එම කුලී රථයේ ගමන් මඟ ගැන විමර්ශනයේදීය.
එහිදී හෙළි වන්නේ එදා ඇය කුලී රථයේ නැඟී ගමන් කර ඇත්තේ බම්බලපිටියේ පිහිටි යම් ස්ථානයකට බවය.
කුලී රථ රියැදුරාගේ සහ කුලී රථයේ ගමන් මාර්ගය සටහන් වූ ජී.පී.එස්. දත්තයන්ට අනුව ඒ තැන සොයාගත් අපරාධ පරීක්ෂණ දෙපාර්තමේන්තුව හෙළි කරගන්නේ ඇය පැය දෙකෙක පමණ කාලයක් එදා ගත කර ඇත්තේ එම ස්ථානයේ බවය. ඒ තැන ගුරුවරියකගේ නිවසකි. ඇයව පැහැරගත්තේ යැයි කියන්නේ ඇය ඒ නිවසේ ගත කරමින් සිටියදීය.
ඇය රටින් පිටමන් කිරීමේ සැලසුමක් ක්‍රියාත්මක වන්නේ ඒ මහා බොරුව විද්‍යාත්මක සාක්ෂිවලින් එසේ හෙළි වෙමින් තිබියදීය.
තානාපති කාර්යාලයේ රඳවාගෙන රැකවරණය දෙමින් තානාපති කාර්යාල බලධාරීන් පවසන්නේ ප්‍රකාශයක් කරන්නට බැරි තරමින් දරුණු ලෙස ඇය අසනීප ව සිටින බවය. ඒ තත්ත්වය ඇති වී තිබෙන්නේ පැහැරගැනීම නිසා බව කියයි.
තානාපති කාර්යාලය සදහන් කරන ආකාරයට අනුව ඇය ලිංගික අඩත්තේට්ම්වලටද ලක් වි සිටී. එසේ නම් මෙරට නීතියට අනුව ඇයව අධිකරණ වෛද්‍යවරයෙකු හමුවට ඉදිරිපත් කළ යුතු ය. එහෙත් තානාපති කාර්යාලය මෙරට විදේශ කටයුතු අමාත්‍යාංශයට දැනුම් දෙන්නේ වීඩියෝ තාක්ෂණය ඔස්සේ ඇගේ තත්ත්වය ස්විට්සර්ලන්ත වෛද්‍යාවරියක විසින් පරීක්ෂාවට ලක් කර ඇති බවය.
ඒ සියල්ලම තානාපති කාර්යාලය සිදු කරන්නේ ඇයව එළියට නොදා රටින් පිට කිරීම වෙනුවෙනි. ස්විස් තානාපති කාර්යාලය ඇය සඟවන්නේ ඇයටත් තානාපති මුක්තිය ඇති බව සිතාගෙනය.
1961 වියානා සම්මුතියට අනුව මේ කියන තැනැත්තිය තානාපති කාර්යාලයේ සේවය කළ පමණින් තානාපති මුක්තිය ලැබෙන්නේ නැත. ඒ ඇයව මෙරටින් තානාපති කාර්යාලයට බඳවා ගනු ලැබු සේවිකාවක වන බැවිනි. ඇය වගකිව යුත්තේ සහ හිස නැමිය යුත්තේ මෙරට නීතියටය. ඇය මේ කරන්නේ තානාපති කාර්යාලයේ සහාය ඇතිව නීතියෙන් රිංගා සෙල්ලම් කිරීමකි.
ඒ සෙල්ලම ගැන දැන දැනත් දිගින් දිගටම අපරාධ පරීක්ෂණ දෙපාර්තමේන්තුවේ නිලධාරීන් තානාපති කර්යාලයෙන් ඉල්ලා සිටින්නට වූයේ සැබෑ තත්ත්වය ගැන ඇගෙන් ප්‍රකාශයක් ලබා ගැනීමට ඉඩ ලබාදෙන ලෙසය. තානාපති කාර්යාලය තුළ තානාපති නිලධාරීන් ඉදිරියේ එම ප්‍රකාශය සටහන් කරගැනීමට පවා සූදානම් බව අපරාධ පරීක්ෂණ දෙපාර්තමේන්තුවේ නිලධාරීන් පැවසූවත් ඊට යහපත් ප්‍රතිචාරයක් නොවුණු තැන අපරාධ පරීක්ෂණ දෙපාර්තමේන්තුව පිහිට පතන්නේ අධිකරණයේය.
ඒ සැමියා සහ දරුවන් දෙදෙනා සමග ගිලන් ගුවන් යානයකින් ඇයව මෙරටින් පැන්නීමේ සැලසුමක් ගැන තොරතුරු ලැබෙන්නට වූ බැවින් ඇය එසේ මෙරටින් පිටව යන්නට පෙර පැහැරගැනීම ගැන ඇගෙන් ප්‍රකාශයක් ලබාගන්නටය.
ගානියා බැනිස්ටර් ෆැන්සිස් නැමැති තානාපති කාර්යාල සේවිකාවට අධිකරණයේ අවසරයකින් තොරව රටින් පිටව යෑම තහනම් කරමින් කොළඹ ප්‍රධාන මහේස්ත්‍රාත් ලංකා ජයරත්න මෙනෙවිය විසින් නියෝගක් පනවන්නේ ඒ අනුවය. ඒත් එක්කම ඇයට තවත් නියෝගයක් කරන්නේ ලබන 09 වෙනිදාට පෙර අපරාධ පරීක්ෂණ දෙපාර්තමේන්තුවට ප්‍රකාශයක් ලබා දෙන ලෙසය.
දැන් මේ නාටකයේ තිරපිටපත සැකසූ තැනේ සිට නළු නිළියන් සියලු දෙනාටම වැඩ වැරදී ගොස් හමාරය. ගානියා බැනිස්ටර් ෆ්‍රැන්සිස් ඇගේ සැමියා සහ දරුවන් දෙදෙනාව රැගෙන යන්නට මෙරටට පැමිණෙමින් තිබුණු ගිලන් ගුවන් යානාවට පවා හරවා යන්නට සිදු විය.
ඒ එම යානාව ගොඩ බැස්සවීමට නිසි අවසරයක් නොලැබුණු තැනය. අපේ රටේ නීතියටත් පරමාධිපත්‍යයටත් බලපෑමක් කරමින් නීති විරෝධි මෙන්ම සදාචාර විරෝධි ලෙස රට අපකීර්තියට පත් කිරීමට සූදානම් වූවෝ සියල්ලු දෙනාම දැන් සිටින්නේ ඇටි කෙසෙල් කෑ උගුඩුවෝ ලෙසිනි.
ජර්මනියේ ශ්‍රී ලංකා තානාපති කරුණාසේන හෙට්ටිආරච්චි මහතා ස්විට්සර්ලන්ත බර්න් නුවරට කැඳවමින් ස්විස් විදේශ කටයුතු අමාත්‍යාංශයේ රාජ්‍ය ලේකම් පැස්කාල් බේරිස්විල් මහත්මිය පැහැර ගැනීම ගැන මෙරට සිදු වන විමර්ශන ගැන තොරතුරු විමසමින් නීත්‍යනුකූල ක්‍රියාවලියක් මඟින් සිද්ධිය සමථයකට පත් කරගැනීමට බලාපොරොත්තුවන බව පවසා ඇත්තේද දැන් ඒ අයද සැබෑව දන්නා නිසාම විය හැකිය.
