මුතුරාජවෙල වගුරු බිමේ පවත්වාගෙන ගිය මහා පරිමාණයේ මත්පැන් නිෂ්පාදනාගාරයක් වටලා ගෝඩා බැරල් 68 ක් ඇතුළු මත්පැන් පෙරීමට යොදා ගන්නා උපකරණ සමග සැකකරුවන් හය දෙනෙක් අත්අඩංගුවට ගෙන තිබේ.
බස්නාහිර උතුරු දිසා නියෝජ්‍ය පොලිස්පති වරුණ ජයසුන්දර මහතා සදහන් කළේ ගෑස් ලිප් යොදාගෙන වගුරු බිමේ දූපත් කොටසක මෙම මත්පැන් නිෂ්පාදනාගාරය පවත්වාගෙන ගිය බවයි.
කැලණිය, ගම්පහ සහ මීගමුව යන පොලිස් කොට්ඨාශවලින් තෝරාගත් නිලධාරීන් 100 ක කණ්ඩායමක් යොදා මෙම වැටලීමේ ඊයෙ සිදුකර ඇත.
ගෝඩා බැරල් 68 ට අමතරව තඹ දගර 04 ක්, ගෑස් සිලින්ඩර් 04 ක් සහ ගෑස් ලිප් 04 ක් සොයාගත් භාණ්ඩ අතර වෙතැයි නියෝජ්‍ය පොලිස්පතිවරයා කීය.
ජනවාරි 01 වෙනිදා සිට මේ දක්වා කාලය තුළ බස්නාහිර උතුර (ගම්පහ දිස්ත්‍රික්කය) දිසාව තුළ කර ඇති නීති විරෝධි මත්පැන් වැටලීම් වලින් ගෝඪා බැරල් 2500 ක්ද, කසිප්පු බෝතල් 93890 ක්ද, සමග සැකකරුවන් 10885 දෙනෙක් අත්අඩංගුවට ගෙන ඇතැයිද වරුණ ජයසුන්දර මහතා සදහන් කළේය.
