කොළඹ නගරයේ රථවාහන ගාල් කිරීමේ මීටර සවිකිරීමට අදාළ කොන්ත්‍රාත්තුව භාරදී ඇති සමාගම මේ වනවිට එම කොන්ත්‍රාත් ගිවිසුම අමු අමුවේ උල්ලංඝනය කර ඇති නමුත් අදාළ සමාගමට තවත් මාස හයක් එම ටිකට් නිකුත් කිරීම සඳහා අවසර ලබාදීමට කොළඹ මහනගර සභාව පියවර ගෙන ඇත .
මේ හරහා නගර සභාවට ඉදිරි මාස හය ඇතුලත රුපියල් මිලියන 400 කට අධික මුදලක් අහිමිවනු ඇති බවද කොළඹ නාගරික මන්ත්‍රීනි ශර්මිලා ගෝනවෙල මහත්මිය අප වෙබ් අඩවිය වෙත අනාවරණය කලාය .
මෙම මීටර සවිකිරීමේ කොන්ත්‍රාත්තුව භාරගත් සමාගම පසුගිය කාලය පුරාම ඒ හරහා ටිකට් නිකුත් කර මහජනතාවගෙන් අයකරගත් මුදල් නිසි ලෙස මහනගර සභාවට ගෙවා නැති අතර එසේ කොන්ත්‍රාතතුව උල්ලංඝනය කිරීමට අදාළ දඩ මුදල්ද ගෙවා නොමැත .
කෙසේ වෙතත් මෙම සමාගමට අදාළ මුදල් හා දඩය ගෙවීමට තවත් මාස හයක කාලයක් ලබාදීමට මෙන්ම , එම මාස හය ඇතුලතත් මහජනතාවගෙන් මුදල් අයකර ගැනීමට එම සමාගමට අවසරය ලබාදීමටත් මහනගර සභාව කටයුතු කර ඇත .
ඒ අනුව එම නීති විරෝධී සමාගමට ඉදිරි මාස හය ඇතුලතත් මහජනතාවගේ මුදල් අනිසි ලෙස ලබාගැනීමට අවස්තාව ලැබී ඇති බවත් මෙය බරපතල අසාධාරණයක් වන බවත් ගෝනවෙල මහත්මිය පැවසීය .
මුදල් යලි ගෙවීම සඳහා මාස හයක කාලයක ලබාදුන්නත් , එම කාල සීමාව තුල මහජනතාවගේ මුදල් තවදුරටත් අයකර ගැනීමට එම සමාගමට අවස්තාව ලබානොදිය යුතු බව ඇය අවධාරණය කර සිටියාය ,
නගර සභාවේ මන්ත්‍රීවරුන් පිරිසක් මෙම සමාගම සමග විවිධ ගනුදෙනුවල යෙදෙමින් ඊට වාසිදායක වන ලෙස මෙසේ කටයුතු කරන බවද ඇය සඳහන් කලාය
