උපරිම සිල්ලර මිලක් නියම කර ඇති පොල් ගෙඩිවල වට ප්‍රමාණය නිවැරදිව මැන ගැනීමට පාරිභෝගික අධිකාරිය නව ක්‍රමයක් හඳුන්වා දෙයි.
පොල් ගෙඩියේ වට ප්‍රමාණය අනුව පොල් මිල ගණන් නියම කිරීම ඊට හේතුවයි.
පොල් ගෙඩියක වට ප්‍රමාණය සැලකිල්ලට ගෙන උපරිම මිලක් නියම කරනු ලැබුවේ පාරිභෝගික ජනතාවගේ සුබ සිද්ධිය උදෙසා බැවින් එය හාස්‍යයට ලක් නොකරන ලෙස ද පාරිභෝගික කටයුතු අධිකාරිය ජනතාවගෙන් ඉල්ලා සිටි.
වට ප්‍රමාණය අනුව පොල් වර්ග කළ යුත්තේ පාරිභෝගිකයන් නොව, වෙළෙන්දන් විසින් බව එම අධිකාරිය පවසයි.
පාරිභෝගික කටයුතු අධිකාරිය පොල් ගෙඩියක් අලෙවි කළ හැකි උපරිම මිල දක්වමින් පසුගිය සිකුරාදා ගැසට් නිවේදනයක් නිකුත් කළේය.
ඒ අනුව වට ප්‍රමාණය අඟල් 13ට වැඩි පොල් ගෙඩියක් අලෙවි කළ හැකි උපරිම සිල්ලර මිල රුපියල් 70කි.
වට ප්‍රමාණය අඟල් 12 – 13 අතර වන පොල් ගෙඩියක රුපියල් 65ක මිලටත්, වට ප්‍රමාණය අඟල් 12ට අඩු පොල් ගෙඩියක් රුපියල් 60 කටත් අලෙවි කළ යුතු වේ.
